Lea Lu el Cinema Sil Plaz

(anr/sr) Venderdis, ils 7 da december allas 20.15 envida Corin Curschellas danovamein el Cinema Sil Plaz a Glion. El rom dalla seria «Corin Invit» ha la cantautura romontscha envidau Lea Lu e band silla tribuna dil cinema. Live vegn Lea Lu a presentar quella sera las canzuns da siu tschunavel disc che porta il tetel «rabbit». Lea Lu ha reflectau davart l’essenza da sia musica e seconcentrescha sin sia vusch. Duront in temps ch’ella era seretratga empau ei l’artista stada creativa ed il resultat ein cumposiziuns da canzuns che prendan cun ellas igl auditori en in spazi nua ch’ils cunfins denter cant, instruments ed il publicum svaneschan. Suenter numerusas presentaziuns en Svizra ed egl exteriur concertescha Lea Lu uss a Glion el Cinema Sil Plaz. Il concert empermetta in viadi musical dalla reducziun meditativa alla libertad plein energia e quei vegn a possibilitar als musicists da secolligiar en tuts muments. Il multiinstrumentalist Medi dalla Frontscha, las cauldas vuschs da Daniela Sarda e Mariana Bühring sco era il giug da percussiun purtont da Claudio Strüby enrameschan cun curascha e bia sentiment las presentaziuns da Lea Lu.

Reservaziuns ed informaziuns:

www.cinemasilplaz.ch