Nagina alternativa al pajament

(anr/ac) Il cussegl grond ha adattà l’agen urden da gestiun per impedir malchapientschas futuras. Il motiv per l’adattaziun èn ils fatgs ch’han procurà durant 10 onns per indicaziuns falladas sin ils attests da paja da deputadas e deputads. Els nun èn stads entusiasmads da l’agir da l’administraziun chantunala. Durant 10 onns han deputadas e deputads dal cussegl grond retschavì attests da paja per lur engaschi politic en il parlament chantunal che nun eran corrects. Las idemnisaziuns per il temp da viadi a las sesidas da parlament e cumissiuns n’èn betg vegnidas nudadas sco entradas, mabain sco spesas. Ussa ston tut las deputadas e deputads stads en uffizi durant quels 10 onns pajar suenter taglia. Deputadas e deputads da chasa lunsch davent da la chapitala grischuna e cun in stedi engaschi en cumissiuns èn pertutgads il pli fitg. Il sbagl na giascha dentant betg tar la singula deputada u il singul deputà, mabain tar l’administraziun da taglia e da persunal. Quai ha la cussegliera guvernativa Barbara Janom Steiner punctuà il mardì passà en il cussegl grond. La manadra da la fracziun liberaldemocratica en il cussegl grond, la deputada Vera Stiffler (pld, Cuira) ha bain concedì ch’i na dettia nagina alternativa a la taglia supplementara che las deputadas ed ils deputads stoppian pajar. Ella ha dentant crititgà la moda e maniera co ils commembers actuals ed anteriurs dal parlament pertutgads da la taglia supplementara sajan vegnids infurmads. Per part hajan els retschavì las infurmaziuns da las medias avant la brev da l’administraziun chantunala. Michael Pfäffli (pld, Engiadin’Ota) ha medemamein crititgà la communicaziun ch’haja derasà il sentiment che deputadas e deputads n’hajan betg inditgà correct lur entradas.

Sbagl tar l’administraziun

Per las indicaziuns falladas e las malempernaivladads è Janom Steiner sa perstgisada tar deputadas e deputads. La cussegliera guvernativa ha explitgà sia chapientscha per la malavita tar ils commembers dal parlament ed ha ditg dad avair scrit a sasezza ina tala brev d’amur essend ch’ella saja anc stada pertutgada curtamain sco deputada da las indicaziuns falladas. La cussegliera guvernativa ha dentant fatg attent a la communicaziun da pressa ch’haja cleramain inditgà che la culpa per las indicaziuns falladas sin l’attest da paja giaschian tar l’administraziun. Ed ella nun è da l’avis che las indemnisaziuns per la lavur da deputadas e deputads sajan exageradas. Vers las spesas pajadas en auters chantuns sajan las indemnisaziuns per la lavur parlamentara en il Grischun mudestas. 
Cun 110 vers nulla vuschs ha il cussegl grond acceptà la revisiun da l’urden da gestiun.