Noua èn igls noss cunsigliers naziunals?

(cp) Varsaquantas commembras da l’Uniun da donnas Savognin vevan s’annunztgia gio la premaveira per l’excursiun digls 29 da november 2018 an la tgesa federala. L’organisaziun è neida fatga da Ramona Schaniel e chegl gio fitg bod perchegl tgi visetas anturn mezde èn fitg dumandadas, uscheia tgi l’uniun da donnas ò survagnia angal ple stgers 30 bigliets. Ena guidada tras la tgesa federala è gratuita. Chella guidada vign fatga d’ena vart dad en guid, da l’otra vart ins po giavischier schi en commember digl cunsegl naziunal ni digls cantuns duess er piglier part. Surtot per far dumondas è chegl fitg interessant. Antras la collegialitad da Ramona Schaniel e Martin Candinas ègl sto cler tgi igl cunseglier naziunal dalla Surselva, tgi è sto ancletg bel dalunga, vigna ad accumpagner las donnas da Savognin.

Vasia bleras fatschas ancunaschaintas

Allas 06.30 ischans parteidas cun dus bus an direcziun da Berna. An l’ustareia d’autostrada «Glarnerland» ègl alloura do en bung café ed ena marenda e nous vagn er savia muantar en mument nossas tgommas. Allas 11.00 ischans alloura rivadas a Berna e vagn contemplo chest grond bietg. Siva d’ena controlla scu sen igls eroports vainsa alloura galdia en aperitiv ainten la «Galerie des Alps», ena ustareia ainten la tgesa federala, e vagn pudia vaseir egn u l’oter politicher pero er Heidi Z’graggen, la candidata pigl cunsegl federal. Siva digl bung aperitiv ischans neidas manadas sen las tribunas dalla sala digl cunsegl naziunal noua tgi vagn dastgea persequitar ena part dalla sessiun. Nous ischan stadas stupeidas dallas bleras soptgas veidas e vagn ans dumando noua tgi seian igls noss cunsegliers e las nossas cunseglieras. Adegna puspe niva ensatgi aint dad isch ni tgi ensatgi pigliva notiers la gasetta ni scriveva ensatge sen sies Laptop. Cura tgi gl’è sto da votar, alloura ègl sto per nous fitg legher da vurdar chel travagl. I currivan per struclar igl battung verd u igl cotschen. Cura tgi vò per far ensatge, alloura èn noss politichers schon segl post. Nous vagn via Viola Amherd, Petra Gössi, Magdalena Martullo e bleras otras fatschas ancunaschaintas. Persungas tgi cunaschagn schiglio angal antras la televisiun.

Bel antop cun ena Sursettra

Vers las 13.00 è la sessiun stada fittada e Candinas è nia tar nous sen tribuna. El ans ò declaro la sala digl cunsegl naziunal ed alloura vainsa pudia eir tras la tgesa federala. En bietg fitg interessant, tgi pareva a nous laics pero enpo scu en labirint. Alloura vagn nous pudia far nossas dumondas. Scu vign decidia tgi tgi tschainta noua? Tge fòn igls differents commembers dallas fracziuns? Tgi pò discorrer ainten la sala digl cunsegl naziunal? Nous vagn gia ena massa dumondas, uscheia tgi la guidada ò gia da neir scursaneida e nous ischans neidas mengia tard a giantar. Ainten la sala dalla cupla vainsa antupo Gerry Pfister, igl president dalla pcd. El ò lia saveir da noua tgi nous seian. Cura tgi el ò santia Savognin ò el dumando noua tgi Gianna Luzio seia. Ella stoptga bagn esser tar nous. Candinas ò organiso tgi ella vigna tar nous an l’ustareia. Siva dad aveir salido mintgigna persunalmaintg è ella stada anc en mument tar nous. Nous vagn gia grond plascheir da vaseir ena Sursettra a Berna, ena Sursettra tgi nous vasagn betg bler a Savognin.

Siva digl giantar cun Candinas vainsa alloura anc galdia dus ouras per vurdar igl bel martgea da Berna. Cumprar aint è sto noss focus – sògl esser oter schi donnas èn sen veia?

Allas 17.00 ischans alloura turnadas a tgesa, stanclas, cun enpo mal allas tgommas, pero er cun bleras belas impressiuns.

Igls resungs dallas commembras èn stos fitg bungs, uscheia tgi niro franc a dar anc eneda uscheia ena bela excursiun. Er igl resung da Martin Candinas a Ramona Schaniel è sto fitg bung. El ò managea tgi nous seian stadas egna dallas miglras gruppas tgi el vegia dastgea manar tras la tgesa federala. An chel senn: En viva sen la donnas da Savognin!