Per il sistem da chatscha actual

Da Hans Huonder / anr

Il cussegl grond ha tractà l’iniziativa cunter la chatscha speziala. La discussiun è stada intensiva e tranter auter ha i er dà critica per il chantun. La chatscha cun dus stgalims – pia la chatsch’auta e la chatscha d’atun – è la suletta soluziun per pudair reglar la gronda populaziun da tschiervs en il Grischun. Quai è il tenor general en il parlament chantunal. Quest sistem saja necessari per tegnair en rom il dumber da tschiervs ed uschia d’impedir anc pli gronds donns en il guaud. Malgrà quai ha i er dà critica per il chantun. L’opiniun da blers chatschaders saja vegnida ignorada, la politica haja disdì. Schegea che l’iniziativa na saja betg realisabla uschia stoppia il chantun far ponderaziuns davart la chatscha en l’avegnir. Il president da la regenza, cusseglier guvernativ Mario Cavigelli, ha fatg valair ils puncts principals che pledan ord vista da la regenza encunter l’iniziativa. La chatscha saja in champ da blers interessents, ella saja fitg cumplexa. El ha defendì la chatscha actuala cun dus stgalims. Quella saja reglada uschia ch’ella saja er etica sco la chatsch’auta, la fin finala sajan quai ils medems chatschaders. «Ina buna populaziun da tschiervs sto avair ina buna structura ed ina tala è pussaivla sulettamain cun ina chatscha regulada», accentuescha Cavigelli.

Pagina 3