Daples products regiunals

DA GION NUTEGN STGIER / ANR

Da taimp an taimp è er basigns da far an ena buteia da victualias en’optimaziun digl sortimaint. Adattar igls products agls giaveischs digls cliaints, chegl ò la societad er fatg aint igl Volg Grava. La filiala Grava dalla Societad da consum Savognin e conturn è ena buteia da victualias tgi marscha bagn. Ella fò cunzont igl sies sarvetsch agls abitants tgi stattan dall’otra vart digl Punt Crap, detg pi concret dalla vart da son Martegn. Cliaints fidevels da chella filiala èn an spezial er igls commembers dalla societad. Digl stgamgiamaint da passa 900 000 francs tgi la buteia fò è ena bela somma d’attribueir alla fidevladad digls commembers e digls oters indigens. Sa tgapescha tgi tar la clientella totgan er blers giasts, gist giasts tgi on en’abitaziun da vacanzas aint igl manevel dalla buteia.

Sarar la buteia è nign tema

Scu tgi Conrad Plaz, igl administratour dalla societad da consum, ò detg vegia la suprastanza dall’associaziun cugl president Bruno Wasescha nign muteiv da sarar la buteia. Vurdo economicamaintg fiss chegl bagn la dretga veia e tuttegna vigna la filiala Grava betg sarada. Igl madem vala er per la filiala digl Volg a Salouf, er ella fitg stimada digls indigens. Cun luvrar la buteia principala a son Mitgel fitg bagn ò la societad ena garanzeia tgi lubescha er da manar dasperas las dus filialas Grava e chella a Salouf. Tgi la buteia Grava è da gronda muntada per l’associaziun da consum conferma alloura er tgi l’emda passada è neida fatga intern an buteia ena pitschna renovaziun, igl è nia optimo igl sortimaint e do agl local en nov vistgia. Plaz menziunescha tgi investos seian nias tranter 15 000 e 20 000 francs per far chellas adattaziuns e midadas internas.

Gronda schelta da 
products frestgs

An collaboraziun cun RetoAndreazzi, igl manader da vendita digl Volg, Rosi Guetg, la scheffa digl Volg son Mitgel, las vendadras dalla filiala a Grava cun la manadra Jvanka Tomulcova è nia fatg an veir senn urden an buteia. Vot deir tgi products tgi marschavan ansomma betg ins ò ramplazzo cun products tgi igls cliaints pretendan oz. Da risguardar igl basigns dalla clientella seia gist per ena buteia da vischnanca en’obligaziun, punctuescha Andreazzi. I sa mossa adegna daple tgi igls cliaints pretendan en grond sortimaint da products frestgs scu per exaimpel verdura. Vetiers vigna tgi products dalla regiun dastgan er betg mantger.

52% dalla sviouta ins fò 
cun products frestgs

Da nov ins catta ainten igls regals, las frestgeras e las vitrignas ena bela paletta da caschiel indigen, da liongias setgas dalla Mazlareia Peduzzi e pang frestg dalla Furnareia e Conditoreia Casparin. La collaboraziun cun producents indigens seia da gronda impurtanza, accentuescha Plaz. El dei er tgi gio oz ins fetscha 52% digl stgamgiamaint ainten la buteia Grava cun products frestgs. Cun angrondaneir igl sortimaint digls products frestgs ed agiuntar la purscheida cun anc daples products regiunals ins spera da far ensatge daple sviouta. Per ena buteia scu chella da Grava ed ansomma er per las otras buteias Volg seia da gronda muntada d’aveir prietschs modests gist er per famiglias. Ultra da chegl ins vegia per emda aglmanc 30 acziuns, concluda Andreazzi. La buteia Grava vign manada scu gio menziuno dad Jvanka Tomulcova. Sustign ò ella da Sarina Collet, la sia substituta, ed alloura da Bernardetta Janutin e Marlies Hodler.