Il cader vegn rinforzaus

(cp) La Garda papala svizra ha slargau siu cader. Egl avegnir dat ei 33 enstagl da 26 sutofficiers. Motivau quei rinforzament ei vegniu cun ils duers che creschan adina dapli.

Alla fin d’avrel ha papa Francestg giu fixau igl effectiv da 110 sin 135 umens. En tut ein 14 novs caders vegni promovi retroactivamein sin l’entschatta december. Ussa stattan pia 13 vicecorporals, 12 corporals ed otg sergents a disposiziun. Aunc mai ha ei dau tontas promoziuns enina sco ussa.

Il commando resta nunmidaus e consista da sis officiers cun divers grads. Era il caplon dalla Garda s’auda leutier cun il grad d’in colonel-litinent.

Il pensum dalla Garda ei da garantir la segirezia dalla persuna e residenza dil papa. Era accumpognan gardists il papa sin ses viadis, controlleschan las entradas el stadi dil Vatican e prestan survetsch da survigilonza e d’honur. Duront ils 26 meins da survetsch ein ils gardists era burgheis dil stadi dil Vatican.