Il triumf da las dunnas

da Martin Cabalzar

La Svizra ha duas novas cusseglieras federalas. L’assamblea federala ha tschernì ier Viola Amherd (pcd) e Karin Keller-Sutter (pld) en il cussegl federal. Uschia sesan en l’avegnir puspè trais dunnas en il cussegl federal. Per l’emprima giada èn duas dunnas vegnidas elegidas en il medem mument en il cussegl federal. Viola Amherd è l’otgavla, Karin Keller-Sutter la novavla dunna en il cussegl federal. En il cussegl federal restan vinavant Ueli Maurer (pps), Simonetta Sommaruga (ps), Alain Berset (ps), Guy Parmelain (pps) ed Ignazio Cassis (pld). Confermada è uschia era la formula magica cun dus represchentants da la Partida populara, dus socialdemocrats, dus liberals ed in cristiandemocrat.

Cun gronda tensiun han ins spetgà l’elecziun per la successiun da cussegliera federala Doris Leuthard (pcd). Sin in tichet dubel aveva la pcd nominà la cussegliera naziunala Viola Amherd (VS) e la cussegliera guvernativa Heidi Z’graggen (UR). L’assamblea federala ha dà la precedenza a Viola Amherd che fa gia dapi 13 onns politica a Berna. Surprendentamain è Amherd gia vegnida elegida en l’emprim scrutini e quai cun il resultat excellent da 148 vuschs da 240 vuschs valaivlas. Sia concurrenta Heidi Z’graggen ha fatg mo 60 vuschs.

La presidenta da la citad da Brig è daventada 2005 successura da Jean-Michel Cina en il cussegl naziunal ed actualmain è Amherd vicepresidenta da la fracziun.

Betg main clera, dentant main surprendenta è l’elecziun remplazzonta per cusseglier federal Johann Schneider-Ammann (pld) succedida. La favurita Karin Keller-Sutter (54) ha medemamain gudagnà la lutga gia en l’emprim scrutini cunter cusseglier dals chantuns Hans Wicki (NW). Ella ha cuntanschì 154 vuschs, Hans Wicki 56.

Keller-Sutter aveva gia gì candidà 2010 per il cussegl federal, alur aveva il parlament dentant preferì Schneider-Ammann. In onn pli tard è ella dentant entrada en il cussegl dals chantuns ch’ella ha presidià quest onn. Ella ha gì la derivanza adattada, la dretga schlattaina ed il satgados politic necessari. Ils ultims onns ha ella pudì concretisar ses profil politic ed ha tschertgà il consens. L’emprima dunna en il cussegl federal è stada Elisabeth Kopp (pld).

Commentari e pagina 3