Lauds per il rapport da structuras communalas

(anr/fa) L’onn 2001 aveva il Grischun 212 vischnancas, a Bumaun 2019 datti anc 106 vischnancas en il chantun. Il cussegl grond ha prendì conuschientscha dal rapport davart las structuras communalas. Dapi damain che dus decennis vegnan las structuras territorialas en Grischun reorganisadas. Quai fan ins cun fusiuns da vischnancas. Il 2001 existivan anc 2012 vitgs grischuns, uss s’ha reducì quel dumber sin bainbaud 106 vischnancas. 11 regiuns han remplazzà ils 11 districts sco er ils 39 circuls sco corporaziuns dal dretg public. Mesemna ha preschentà la regenza il rapport davart las structuras communalas. «Igl è ina survista cumplessiva da la situaziun actuala», ha ditg il president da la cumissiun predeliberanta Bruno Claus (pld, Cuira). Per las fusiuns da vischnancas èn, sco ch’el ha cuntinuà, vegnids mess a disposiziun ils ultims 20 onns 190 milliuns francs: «Quai èn daners bain investids, la situaziun da las vischnancas fusiunadas è uss buna fin fitg buna.» Deputads ch’èn era presidents da vischnancas fusiunadas, sco p. ex. Rico Lamprecht (pbd, Val Müstair), Emil Müller (pbd, Sur Tasna) e Paolo Papa (pbd, Calanca) han quintà da lur experientschas cun las novas structuras communalas. A l’avis da Philipp Wilhelm (ps, Tavau) ed era da collegas dad autras partidas maina la via enchaminada vinavant il chantun Grischun. I manchia en il rapport dentant in sguard vers l’avegnir, ha manegià René Epp (pcd, Mustér). Cussegliera guvernativa Barbara Janom Steiner ha ditg ch’il rapport saja mo ina survista da la situaziun regiunala e communala. «L’onn 2019 vegn elavurà a maun da l’egualisaziun da finanzas chantunalas in rapport davart l’effect finanzial da las fusiuns da vischnancas», ha ella ditg, «il cussegl grond vegn a tractar quel l’onn 2020.» Il parlament ha prendì da maniera bainvulenta enconuschientscha dal rapport.