Martullo fiss er ina dunna

«Igl è stà nairas uras. Sche las duas dunnas na fissan betg vegnidas elegidas fiss mo pli Simonetta Sommaruga stada en il cussegl federal. Quai na va betg, mo ina dunna sin set sezs. I dat gea dapli dunnas ch’umens en nossa societad. Dacurt ha SRF emess ina docu: Da 117 cussegliers federals èn mo set stadas dunnas. Il temp è pia pli che madir per dunnas en il cussegl federal.

Sch’ins pensa dentant che Ueli Maurer sa retira e Magdalena Martullo candidescha forsa hai jau schon tscherts cumbats interns. Ma ins sto dir: Igl è stà gist che la pcd ha preschentà in ticket stget feminin. Sch’ins è consequent ston ins pia era morder en in mail asch ed acceptar che Martullo fiss er ina dunna. La finamira è numnadamain che las dunnas pon far politica normala e na ston betg sa fatschentar cun tematicas da dunnas.

En il film sin SRF ha Doris Leuthard ditg che la sortida da l’energia atomara saja stada pussaivla be cun las dunnas en il cussegl federal. Ina tala maioritad è er impurtanta per realisar la cumpatibilitad da famiglia e professiun. Igl è gea incredibel quant ditg ch’ins ha duvrà per acceptar ina quota da dunnas light e da far in pitschen pass per l’egualitad da paja. Puncto tematicas da dunnas è la Svizra in pajais da svilup.»