Dal Piz Arina fin pro orizonts in pajais lontans

(anr/fa) Fin la mità da schner 2019 muossa Iris Riatsch illa Grotta culturala a Sent üna schelta da sias ouvras. Il prüm expuona l’artista da Vnà disegns da charbun e tagls in lain e lura lavuors in culur. «Fuormaziuns dal crap süsom il Piz Arina» e purtrets dad «Oters muonds ed orizonts»: In sonda passada ha gnü lö illa Grotta da cultura a Sent la vernissascha da l’exposiziun dubla da l’artista Iris Riatsch da Vnà. Fin als 22 december as poja verer ils disegns da charbun e craida e’ls squitschs in lain, blers impustüt davart la natüra alpina intuorn il Piz Arina. Bleras da quistas lavuors sun illas culuors alb e nair. Dals 29 december fin als 15 schner preschainta l’artista lura üna tscherna da purtrets in culur da pastel. Quai saran purtrets da cuntradas ed orizonts ch’ella e seis hom Domenic han vis in pajais esters. Ün numerus public d’eira gnü in sonda a la vernissascha a guardar las lavuors dad Iris Riatsch.

«Fascinada da las fuormaziuns 
dal grip»

L’artista ama la natüra e’s lascha eir inspirar da detagls da quella per sia lavur creativa. Ün da quels detagls sun las fuormaziuns da la crappa süsom il Piz Arina, «crappa chi’d es exposta al clima crüj d’instà ed a la naiv e’l glatsch d’inviern». Sco cha’l geolog indigen Matthias Merz tilla ha declerà as tratta da plattai grischun. «L’erosiun ha fuormà quist crap, l’aua chi aintra in sias sfessas dschela e schloppainta lura davent parts dal crap», ha dit Iris Riatsch.

Ella ha skizzà e fotografà las fuormas sulvadias dal crap süsom l’Arina. In seis atelier a Vnà o i’l prümeran in Prà San Peder ha’la fat ils purtrets e tagls in lain pels squitschs. «In lavurond da maniera fich intuitiva prouva da metter quai ch’eu resaint cun verer craps, cuntradas ed oter in meis purtrets», ha declerà l’artista e dit ch’ella stetta landervia e disegna e pittura fin ch’ella vezza i’l purtret eir quai ch’ella vaiva resenti. «Schi nu grataja metta davent la lavur.»

Amatura da la vastezza 
da cuntradas e’ls orizonts

Illa seguonda part da l’exposiziun muossarà Iris Riatsch cuntradas ch’ella e seis hom han vis sün lur viadis p. ex. in Namibia o in Bolivia. Quistas cuntradas ha ella pittürà in culur pastell. «E lura muossaraja eir üna schelta dad orizonts ch’eu n’ha eir fich jent, eu am il vast.» Intant cha la prüma part da sia exposiziun sun lavuors impustüt in alb e nair as vezzaraja illa seguonda cha l’artista lavura jent eir cun culuors.

Ella tillas maisda fin ch’ella ha propcha quel tun ch’ella less. «Eu n’ha gust ch’eu n’ha survgni qua illa Grotta la pussibiltà da muossar mias lavuors in duos parts, uschea nu daja ün masdügl dals purtrets in culur e dals oters», ha dit l’artista da Vnà. Seis purtrets sun dad üna vart realistics, per part eir plü abstracts. Quai vala pels orizonts, ma eir per otras lavuors.

Duos purtrets per exaimpel ha ella fat davo üna gita culs skis dal sulai chi splendura tras la tschiera: «I nu’s vezza precis ingio cha quai es, meis böt d’eira da far resentir plütöst l’atmosfera chi regnaiva in quist mumaint particular.»

La Grotta da cultura a Sent es averta il mardi e la sonda da las 17.00 a las 19.00. La sonda es preschainta eir l’artista Iris Riatsch.