Nadal cun glioirs e golps

(anr/gns) Marde proxim davaintan 50 mattatschas e mattaschs actouras ed actours. Preschento vign en gi da Nadal tgi ò da far daple cun la morala da chella gronda festa tgi cugl bam- bign, Maria e son Gisep. Igl advent è igl taimp per sa legrar alla festa dalla gleisch, a Nadal, igl de tgi stat per legreia, amour e pasch. Nadal è er egn digls gronds firos digl cristianissem e Nadal è er en de tgi stat fitg manevel a mintga unfant. L’istorgia da Nadal è savens er la litteratura per en teater da scola e chegl durant igl advent. A dus preschentaziuns dad en gi da Nadal anveidan er igls 50 unfants dallas ampremas treis classas primaras dalla scola da Surses.

Anmez las 
provas

Anc ègl pero betg schi gliunsch tgi igl uman dalla tribuna an sala Grava sa derva per las dus preschentaziuns digl teater da Nadal singular. Da preschaint èn las treis scolastas Domenica Steier, Sarah Cadotsch e Ramona Imper cun lour 50 unfants anc anmez las provas ed anfignen tgi è schinavant tgi igls actours e las actouras sa preschaintan agl public spetga anc blera lavour. Sustign on las treis scolastas alloura er da Silvia Demarmels, Seraina Giovanoli ed Evelyn Soltani. Per la musica e per la buna translaziun rumantscha dallas canzungs segna Claudio Steier.

Daple tgi illuminaziuns 
e decoraziuns

Igl gi da Nadal cozza stgers 60 minutas ed el tematisescha cunzont nossa bagnstanza, noss pac respect anvers fauna e flora ed er l’etica anvers mintga concarstgang. La fegnameira è da mussar agls unfants ed er agls aspectatours tgi Nadal è bler daple tgi angal societad, commerzialisaziun, illuminaziuns e decoraziuns. Igls 50 unfants preschaintan plessas fassettas or dalla veta da mintga de, seia chegl da nous umans u er dalla vista da blers animals.

Preschento vign igl teater marde, igls 11 da december allas 14.00 ed allas 19.00 an sala Grava a Savognin.