Trais cantatas da l’Oratorium da Bach chi han stimulà

DA BENEDICT STECHER / ANR

Il «Freier Chor Zürich» cun seis manader e dirigent Peter Appenzeller e divers solists ed instrumentalists han concertà illa baselgia San Geer a Scuol. Els han preschantà trais cantatas da l‘Oratorium da Nadal da Johann Sebastian Bach (1685–1750). L’Oratorium da Nadal da Bach cumpiglia ses cantatas e d’eira pensà per chantar mincha dumengia avant Nadal üna da quellas. Quella jada gniva la musica contemporana vivüda in möd intensiv. Eir hoz amo, davo bod 300 ons, intermedieschan las cumposiziuns plaschair e quai dürarà eir inavant. Il concert dal «Freier Chor Zürich» in sonda saira a Scuol s’ha dedichà a las cantatas quatter fin ses culla tematica da la restricziun e cun dar il nom a Gesu. La tschinch- e sesavla cantata quintan l’istorgia dals trais rais. Il chant es gnü accumpagnà a Scuol da gïas, cellos, trumbettas, gïun, oboas, fagot, battaria, corns ed orgel da baselgia. Musica e chant, suot la bachetta da Peter Appenzeller, es gnüda preschantada cun blers mumaints pensivs e commovents. La cumbinaziun dad instrumaints e chant nu d’eira adüna simpla, es però gratiada fich bain.

«Quempas», duos chanzuns da Nadal

Tanter las cantatas sun eir gnüdas preschantadas duos chanzuns nomnadas «Quempas» da Michael Praetorius (1607) chi quintan l’istorgia da Nadal in möd modest e natüral, in möd sensibel e per part ün pa dissonant. Quellas duos chanzuns vaivan eir l’intenziun da dar al concert daplüssa variaziun. Ils texts da l’oratorium sun gnüts chantats in üna lingua tudais-cha insolita, in möd sco chi’s chantaiva avant 300 ons. «Beà a vo chi vaivat vis quella glüm, id es success per vos bön«. Ma eir: «Teis pled dess esser per mai la chandaila la plü clera in tuot mias ouvras«, per nomnar be duos. Introductiv da dit Appenzeller: «Vo dudivat hoz musica da Bach chi tocca propcha sün quist grip qua, immez la val, chi ha üna lung’istorgia. La musica quinta dal muond inter e da la creaziun pel futur, Bach es adüna contemporan.«

«Freier Chor Zürich» 
daspö ün quart tschientiner

Il «Freier Chor Zürich» exista daspö bundant 25 ons ed as chatta mincha marcurdi ad üna prouva. El vain manà daspö il principi da Peter Appenzeller e dombra var 80 commembers. Il cor es fich activ e chanta sper oratoriums eir a cappella e’s dedichescha eir a progets dad operas. I’l center stan impustüt eir la fuormaziun da la vusch, la cultura dal tun e da l’udida. Appenzeller es nat e creschü sü a San Murezzan. Davo la matura a Zuoz ha el fat la scolaziun da magister primar. Davo il stüdi da musica a Turich ha el eir imprais da sunar il clavazin. Sper sia vocaziun sco magister da musica a la scoula Rudolf Steiner lavura el eir sco artist da musica independent. El as dedichescha eir a divers progets ed ha scrit bleras cumposiziuns per fuormaziuns da chor, diversas da quellas in lingua rumantscha.

L’Oratorium da Nadal da Bach

L’Oratorium da Nadal da Bach cumpiglia ses parts per cor masdà, solists ed orchester. Las singulas cantatas sun gnüdas preschantadas la prüma jada dal Thomanerchor a Leipzig dal 1734 dürant las ses dumengias avant Nadal. Las ses cantatas as dedicheschan cun grond plaschair a la naschentscha da Gesu. In quai chi reguarda il gener musical as poja congualar l’Oratorium da Bach cun las Paschiuns oratoricas. I’s tratta da la plü cuntschaint’ouvra sacrala da Bach e da la plü renomnada cumposiziun religiusa. La musica derasa cuntantezza ed ingrazchamaint. Cur cha l’oratorium vain preschantà para illas baselgias il muond d’esser amo intact. L’oratorium vain preschantà vieplü e chatta adüna daplüs interessats. Plü bod d’eira l’advent ün temp quiet ingio cha l’umanità faiva penitenza ed hoz es quai il temp hectic dals gronds affars.