La fiera da Nadal ad Andeer

(anr/bt) Igl tains d’advent viva da tradiziùns. Egna beala tradiziùn c’igl dat gea da diferaints ons annà e la fiera da Nadal d’Andeer. Ella e ampo ple speziala ca talas d’utro parquegl c’ella â liac sen la Pùnt da Lenn curvatada ad e iluminada da candelas a litearnas. Quell’ocurenza, c’â pletost igl caracter d’egna santupada da la glieud digl conturn, eara vagnida inizieada da la fiera digls produzents cun Christian Köfler a la testa. A sco oters ons rigeva ear uon egna stupenta atmosfera sen la pùnt noua ca tànts ân prieu la caschùn da cumprar igls davos regals da Nadal tier egna da las 18 buteias da fiera near giuder igl vegn tgòld, igls berliners frestgs digl Christian Köfler near semplameing par talatgear sur da quegl e tschegl cun star da cumpagneia an «l’ustreia da Nadal» da la Tanja Gmür an l’anteriura stiva digls pumpiers manevla.

«Uon e’gl forsa betga sto tànta glieud sco oters ons. Mo igl e adign’anavànt rivo anzatgi, ascheia c’ign veva peada da ruschanar cun l’egn l’oter», comentescha Köfler la fiera. «A gest quegl e sto igl ple bi.» Puspe ân ign gieu l’ocasiùn da cumprar da tutas sorts tgossas a tgossetas fatgas dad indigens. Ign â pudieu cumprar surtut bumas, vegn tgòld, liquors, caschiel, andutgels, pualpa, pàn cun péra, candelas a blears zambargiezs. «Tut igls vandiders darivan da la regiùn, nign e d’utro», loda Köfler. «Cumbagn c’egn mi â amparo scha nus vandeian betga tgossas da la China.» Mo quegl fussi betg agl senn digls organisaturs. «A gest parquegl ca la fiera â liac sen la Pùnt da Lenn e ella aschi speziala», loda Manuela Michael, egna da las vandidras.