Reavertura da la caschareia d’Andeer

(anr/bt) Da questa parmavera annà e la caschareia d’Andeer stada sarada parveia da lavurs da renovaziùn. La dumeingia proxima â liac l’inauguraziùn digl stabilimaint nov cun egn gi da las portas aviertas. La sagnùna Maria Meyer a sieus cunsort Martin Floh Bienerth salegran digl manaschi nov, sco ca quella fotografeia qua sut mussa. A caschùn da las davosas lavurs e vagnida furnida la caldera nova c’eara fatga sen masira. L’antrada scheva numnadameing da mintga màn me egn spazi d’egn zentimeter. «Nus earan sco sen spegnas», gi Bienerth, sch’ella passi. «Vasànd ussa la caldera an la caschareia nign ca cre c’ella vegi pudieu passar la largia digl esch.» La caschareia e egn digls impurtànts manaschis d’Andeer. «Ella eara vagnida biageada digls babs da la generaziùn digls purs actuals ca vevan alura stgafieu egn’ovra a lùnga perspectiva», loda Bienerth. «La generaziùn c’e uss activa â puspe prieu l’ocasiùn da far anzatge pigl avagnir, par la proxima generaziùn.» Davent da las 12.00 da miezgi en aviertas las portas da la caschareia renovada d’Andeer par la publizitad, la quala e anvidada da prender anvesta agl manaschi renovo. Igls signùns Maria Meyer a Martin Floh Bienerth sco ear las puras Ruth Melchior, Ricarda Michael ad Erika Brand banavaintan bugent interessadas ad interessos.