Sontgaclau e sogn Giusep s’entaupan danovamein…

Gievgia, ils 6 da december ei stau il di da Sontgaclau. Quei sa pign e grond. Ils cussadents dalla Casa sogn Giusep a Cumpadials han danovamein survegniu viseta dil sogn da spagnolettis e mandarinas. Pia ha il cumpogn da sogn Giusep visitau las cussadentas ed ils cussadents a Cumpadials. Igl ei daventau usit ch’il sogn e siu ner cul sac sepresentan en casa e prendan peda per in e scadin dils cussadents.

Battacor han franc buca mo ils pigns, era ils cussadents vegnan intec nervus cu ei audan ils pass e la vusch da Sontgaclau. Secapescha ein il sogn e siu gidonter buca vegni cun mauns vits. Il ner ha repartiu sin mintga meisa spagnolettis, mandarinas e mams e vitier per mintgin aunc in pign present. Cu ils cussadents han consumau las bienas ein tier in u l’auter ualti carteivel regurdientschas dil temps d’affonza vegnidas neunavon. «Igl ei adina bi da vegnir cheu tier vus», manegia Sontgaclau. «Cheu regia ina buna e pascheivla atmosfera. Per haver pasch in cun l’auter en ina communitad drova ei la beinvuglientscha da mintgin. In e scadin sto prestar il siu e sespruar da far il meglier per saver viver in cun l’auter en harmonia.»

Tut ils cussadents ein selegrai sco affons dalla viseta da Sontgaclau e siu gidonter. En verdad er’ei ina gidontra! Martin Venzin ed Anita Degonda han puspei adempliu in grond giavisch e desideri dils cussadents cun sepresentar sco sogn e ner gidonter.

«L’auter onn astgas ti puspei vegnir», ha ina cussadenta manegiau cu il sogn e siu gidonter ein serendi encunter Cumpadials. Bein il pli bi cumpliment per quei engaschi? Ciprian Giger