Üna da las prosmas sarà la staziun da Lavin

DA FLURIN ANDRY / ANR

Fin da l’on 2023 ston esser tuot las staziuns dal trafic public accessiblas eir per persunas handicapadas. Eir in Engiadina es la Viafier retica landervia ad allontanar las barrieras chi impedischan quel access. La ledscha federala davart l’egualità da persunas cun impedimaint ha il böt da dar a tuots la pussibiltà da’s partecipar a la vita publica. Quai includa per exaimpel ils access in edifizis publics, sco chasas cumünalas o chasas da scoula. Eir las persunas handicapadas dessan pudair entrar e sortir d’ellas da maniera independenta. Quai dess esser il cas eir pro’l trafic public: Quista ledscha dà als respunsabels da las viasfier temp fin a la fin da l’on 2023 per fabrichar lur staziuns uschea chi sun accessiblas per tuots.

123 staziuns da las VFF varan retard

D’incuort ha l’Uffizi federal per trafic comunichà cha las Viasfier federalas (VFF) rivaran fin al principi dal 2024 da garantir l’access independent per tuots in 624 da lur 747 staziuns. Per 123 staziuns düraraja probabelmaing plü lönch. In Grischun es eir la Viafier retica (VR) landervia a fabrichar nouvs suotpassagis e rampas invezza da s-chalas in bleras da lur staziuns. I’ls ons 2001 fin 2008 es gnüda renovada la staziun da Cuoira, allontanond tuot las barrieras per persunas handicapdas. La staziun da Glion vain eir renovada da maniera ch’ella accumplischa a temp las pretaisas da la ledscha federala. Fin la fin da l’on 2019 sarà eir la staziun da Poschiavo accessibla per tuots. E co as preschainta la situaziun da las staziuns da la VR in Engiadina? Yvonne Dünser, la pledadra da pressa da la VR, infuormescha.

Staziuns plü grondas 
sun fingià accessiblas

Sco ch’ella disch correspuondan tuot las staziuns plü grondas illa regiun a las prescripziuns da la ledscha federala davart l’egualità da persunas handicapadas. «Confuormas a quella ledscha sun San Murezzan, Samedan, Punt Muragl, Madulain, Zernez e Scuol.» In planisaziun e realisadas fin da l’on 2023 sun ulteriuras desch staziuns. «I’s tratta da las staziuns Schlarigna, Bever, Puntraschigna, Zuoz, S-chanf, Cinuos-chel-Brail, Susch, Sagliains, Lavin ed Ardez.» Las prümas lavuors vi da la staziun da Lavin han cumanzà fingià quist on. Ella ha survgni ün ulteriur binari. Apaina cha’l seguond binari es a fin vain da l’on 2019 fabrichà ün suotpassagi accessibel eir per persunas cun impedimaint. Il medem vala pella staziun a Sagliains chi vain renovada e per part ingrondida. «Eir ella sarà davo accessibla per tuots.» Fabrichadas oura be per part e realisadas a fin fin il plü tard da l’on 2040 vegnan, sco cha Dünser cuntinuescha, las staziuns da La Punt-Cha-
mues-ch e Guarda. Uschè chi restaran na accessiblas per tuots be amo las staziuns per far spassegiadas Schlarigna-Staz, Punt Muragl-Staz e Ftan Baraigla.