Betg in sistem 
per tuts, mabain 
mintgin sco el vul

Il cussegl naziunal è suandà la proposta dal cussegl dals chantuns: Ils chantuns han tut las libertads dad eleger sezs co els vulan laschar eleger lur parlaments. La cumissiun dal cussegl naziunal aveva anc decidì da stritgar la passascha or da l’artitgel – la passascha che di ch’ils chantuns sajan libers da decider ils cirquits d’elecziun e las reglas spezialas per las elecziuns. La cumissiun è stada da l’avis ch’ils cirquits d’elecziun stoppian esser furmads uschia ch’els na cuntrafetschian betg al «principi da l’egualitad dal dretg da vuschar», vul dir che mintga vusch ha la medema valur. La maioritad dal cussegl naziunal è dentant stada d’autra opiniun ed ha surpiglià il text dal cussegl dals chantuns. Be cun quella formulaziun saja la suveranitad dals chantuns da decider en atgna reschia davart lur sistem d’elecziun garantida. Il Tribunal federal na duai betg pli pudair crititgar la grondezza dals cirquits d’elecziun en tscherts chantuns.

Empè dad ina saiv da segirezza datti flurs, crappa e bostga per la rundella sin la via d’Engiadina sper Giarsun, gist sut Guarda. L’avrigl da quest onn aveva la vischnanca da Scuol incumbensà ina giuria da la fracziun da Guarda da realisar ina concurrenza per embellir la nova rundella da Guarda. 13 propostas èn entradas e da quellas ha il project da l’artist Gianin Conrad da Domat fatg la cursa. Sia idea fiss stada dad installar trais saivs da segirezza ina sur l’autra e colurar quellas en grisch, verd e blau – uschia sco las colurs da la natira. La vischnanca da Scuol, oravant tut la suprastanza, ha constatà bain spert ina tscherta sceptica envers quel project – ed ha midà idea. Uss è la suprastanza communala da Scuol sa decidida definitivamain per in auter project: Realisada vegn la proposta da l’architect Urs Padrun da Guarda. Quella prevesa d’adattar la rundella als conturns ed ornar ella cun plantas, bostga e crappa natirala. Tenor Christian Fanzun, il president communal, avess ins forsa stuì reglamentar pli fitg las reglas per realisar la concurrenza. Finalmain hajan ins chattà la storta e chattà tuttina anc ina soluziun cun la quala er la giuria saja perencletga.

Schebain la Svizra duai approvar il pact da migraziun da las Naziuns Unidas ONU u betg, quai duai esser ina decisiun dal parlament. La maioritad dal cussegl naziunal è stada da l’avis ch’il parlament possia uschia sa fatschentar pli profundamain cun il pact da migraziun. In na definitiv al pact ha il cussegl naziunal refusà cun 104 cunter 90 vuschs tar ina abstenziun. Divers pajais han acceptà il glindesdi uffizialmain il pact da migraziun a Marrakesch. La Svizra è stada absenta a la conferenza: Il cussegl federal sustegn bain il contract, ha dentant decidì da spetgar ils resultats da las debattas en il parlament.