Cussegl naziunal di na a lescha da CO2

(rtr) La lescha da CO2 ha fatg naufragi en il cussegl naziunal. Perquai ch’il cussegl aveva moderà quella n’ha la finala betg mo la pps, mabain er la sanestra refusà quella. En la votaziun finala suenter debattas da 12 uras ha la chombra gronda ditg na a la lescha cun 92 encunter 60 vuschs e 43 abstenziuns. Questa lescha avess previs da reducir emissiuns da gas cun effect da serra fin il 2030 per la mesadad en cumparegliaziun cun 1990. Questa finamira avess anc chattà sustegn da la maioritad dals cussegliers, tar las mesiras da realisaziun èn las opiniuns stadas divididas.