Scleriment da paja

(anr/ac) Il deputà Remo Cavegn (pcd, Razén) ha remartgà en sia dumonda inoltrada en il decurs da la sessiun passada dal december ch’ils emploiads dal chantun na retschaivian betg pli indicaziuns davart lur classa da paja e nua ch’els sa chattian en il svilupp da paja e davart supplements da paja tenor funcziun. Emploiadas ed emploiads che sajan s’interessads per talas indicaziuns hajan retschavì per argument ina nova ordinaziun da l’Uffizi da persunal, scriva il deputà en sia dumonda. Sin fundament da quellas indicaziuns vulan il deputà e ses cunsegnaders savair da la regenza il motiv e la raschun legala per refusar ad emploiadas ed emploiads las infurmaziuns davart l’atgna paja. Plinavant vul il deputà era savair da la regenza sch’ella saja pronta da reintroducir las indicaziuns davart la paja sin il rendaquint da paja da mintga singul emploià.