Candinas crititgescha tariffas mulestusas

Da Claudia Cadruvi / ANR

Pendicularas ed ovras idraulicas vegnan controlladas regularmain da l’inspecturat cumpetent che tschenta suenter quint per las controllas obligatorias. I sa tracta per part da quints ensalads – gist per ovras e pendicularas en regiuns da muntogna. Martin Candinas crititgescha perquai las tariffas da l’Inspecturat federal d’installaziuns a current (Esti). En in’interpellaziun inoltrada quest’emna pretenda il cusseglier naziunal ch’ins introduceschia tariffas pauschalas.

Pajar viadi e temp da lavur

Gist en las regiuns da muntogna na chapeschian ins betg las tariffas da l’inspecturat, argumentescha Candinas. Per las medemas prestaziuns stoppian las pendicularas u ovras pajar differents pretschs – tut tenor nua ch’ellas sa chattian. La raschun per gliez saja che l’inspecturat quintia ils custs effectivs e las expensas effectivas per las controllas. Perfin il survegliader da pretschs confermia ch’el survegnia regularmain reclamaziuns. En las regiuns periferas da la Svizra dettia quai numerusas installaziuns a current che stoppian vegnir controlladas regularmain. La metoda da tschentar quint dischavantageschia dentant questas regiuns. Las controllas en il Grischun fetschian ils inspecturs da Fehraltdorf. Per lezs na vegnia betg mo tschentà quint per ils kilometers da viadi, mabain era per il temp da lavur ch’els sesian en l’auto. L’Esti quintia 180 francs per l’ura da lavur d’in collavuratur.

«Questa pratica sto avair ina fin», pretenda Candinas. «I na dat nagina raschun pertge ch’in institut public sco l’Esti n’applitgescha betg ina metoda gista da scuntrada.»

Pauschalas fissan meglier

Il problem sa laschia schliar cun la pauschalisaziun da las tariffas per ils custs da viadi plus il temp da viadi. Ina tala pauschalisaziun vegnia applitgada en blers secturs da l’Administraziun federala e perfin da l’economia privata. Ella saja giuridicamain nunproblematica.