Il «derschalet» è il 
Pled rumantsch 2018

Il «derschalet», il «palpader», «lindornar», «scornar» ed il «chüsatoff». Per quels tschintg pleds era la giuria sa decidida tar il Pled rumantsch 2018. Rumantschas e Rumantschs han decidì. Il «derschalet» – in nausch siemi che bitta ins ord letg – è il Pled rumantsch 2018. Cun 42% da las vuschs ha el pudì persvader il pli fitg il public dad RTR. Sin il segund plaz suonda cun 27% il «chüsatoff», ina versiun rumantscha per il «whistleblower». Trais emnas ha il public pudì inoltrar propostas per il pled ad RTR. Da las total 114 propostas ha lura ina giuria definì tschintg pleds davart ils quals il public ha pudì decider. En la giuria èn stads da la partida Anna-Alice Dazzi, linguista tar RTR, Gion Nutegn Stgier, redactur anr e Viola Pfeiffer, romanista ed autura. La giuria aveva era resguardà che radund ¾ da las propostas inoltradas n’han gì nagin connex cun l’onn 2018. Perquai ha ella elegì ils dus pleds «derschalet» e «lindornar». Il pled «derschalet» ha inoltrà Mattias Arpagaus da Laax e suonda sin «flutgets» ch’è stà il pled da l’onn 2017.