In accent encunter la depopulaziun

(anr/hh) Venderdis proxim decida il suveran da Sumvitg davart in credit brut da 670 000 francs per transformar habitaziuns per giuvenils ord stanzas dalla scola a Sumvitg. Sco quei ch’il president communal Armin Candinas di ei igl interess per affittar las treis habitaziuns gronds. Biebein 50 onns ha la casa da scola a Sumvitg surviu sco liug d’instrucziun d’affons e giuvenils. Muort il diember sminuent d’affons ei vegniu decidiu da serrar la casa da scola la stad 2017. Fetg spert ei la damonda setschentada tgei far cun las localitads. En connex cun in luvratori organisau per examinar las pusseivladads futuras dil nez dallas stanzas ei l’idea da realisar habitaziuns per giuvenils sedada. Il project «habitar@giuven» vul promover semplas habitaziuns per giuvenils e quei cun tscheins raschuneivels. «Cun la pusseivladad d’habitar en vischnaunca duein ils ligioms dalla giuventetgna cun la vischnaunca da Sumvitg vegnir rinforzai ed aschia duei vegnir frenau la depopulaziun», constateschan ils exponents dalla vischnaunca. L’entschatta da quest onn ha la suprastonza communala vuliu sentir il puls dils giuvenils, vul dir examinar igl interess per talas habitaziuns. All’orientaziun cun presentaziun d’in studi ein 80 persunas separticipadas, da quei 60 giuvnas e giuvens. Ina retscherca cun questiunari ha allura mussau ch’il basegns ed interess per habitaziuns per giuvenils ei facticamein avon maun. Sin fundament da quels resultats positivs ha la suprastonza communala allura installau ina cumissiun cun gerau Robert Candinas, il canzlist communal Fabian Collenberg, Alexander Deplazes, Martin Monn e Lucas Tuor. L’incarica: Sclarir en detagl l’interessenza, menar discuors culs interessai, elaborar ideas e la finfinala concretisar il project. Sco architect ei Patrick Rothmund da spacial design GmbH, Trun, vegnius engaschaus.

Treis habitaziuns

Il project concretisau preveda ell’alzada sisum dalla casa da scola ina habitaziun da 3½ stanzas e duas habitaziuns da 2½ stanzas. La grondezia dallas anteriuras stanzas da scola lubescha habitadis per mintgamai duas persunas. Las habitaziuns dueien vegnir endrizzadas cun ina part mobiliar per aschia porscher ina plivaleta alla giuventetgna. Mintga habitaziun dispona d’ina stanza da deponer material. Pils affittaders stat in pistregn communabel cun maschina da lavar resti ed ina schigentera a disposiziun. L’investiziun ei calculada cun cuosts da 670 000 francs. Tenor la suprastonza communala sebasa quella calculaziun sin offertas. Aschilunsch che la radunonza communala approbescha il project e conceda il credit duei la damonda da baghegiar vegnir fatga, aschia ch’ei duess esser pusseivel d’entscheiver cun las lavurs l’entschatta da l’auter onn. La finamira ei da terminar ellas miez zercladur 2019, aschia che las habitaziuns stessen a disposiziun als affittaders naven dall’entschatta fenadur. Sco quei che la suprastonza communala constatescha en siu messadi per mauns dalla radunonza da vischnaunca da venderdis sera s’auda la construcziun d’habitadis buca tiels pensums primars d’ina vischnaunca: «Tonaton ei il project digns da vegnir realisaus. Cun la realisaziun dil project segirescha la vischnaunca numnadamein l’utilisaziun d’in anteriur edifeci da scola che restass autruisa probabel vits. Il spazi necessari ei avon maun e l’interessenza ei dada.» Culs tscheins d’affittaziun sepagan ils cuosts d’investiziun. «In grond avantatg ei denton che persunas giuvnas san prender domicil en vischnaunca. Quei generescha svilup economic ed entradas da taglia. Plinavon ei il project in accent encunter la demografia negativa.»

Ulteriuras fatschentas

Sper la tractaziun dil project ed il credit per las habitaziuns per giuventetgna sefatschenta la radunonza da vischnaunca damaunasera era dil preventiv 2019, pei da taglia e davart la cumpra d’in auto-cistiarna pil Corp da pumpiers Sumvitg-Trun. Plinavon davart la sanaziun dils stans da sittar a Plaun Petschen e Sulagval sco era pertuccont il project dalla via da mistregn a Rabius-Marias.