Verer crisas sco schanza per alch nouv

DA BENEDICT STECHER / ANR

Il film «Shaolin a Tschlin» quinta da Corsin Biert chi ha superà üna crisa cun cumbatter per seis sömmis e da verer crisas sco schanza. Duos maisters da Shaolin chinais han trenà e scolà a Biert in üna clostra in China per til güdar da superar seis problems. In mardi saira ha gnü lö la premiera dal film «Shaolin a Tschlin» i’l Center da Bainesser ill’anteriura chasa da scoula a Tschlin. Il film es gnü realisà da Susanna Fanzun insembel cun Radiotelevisiun Svizra Rumantscha (RTR). Il motiv da Corsin Biert da müdar alch in sia vita d’eira evidaint: «Eu n’ha badà ch’eu staiva müdar alch vi da mia vita e sun stat pront da far quel pass. Il möd da viver ch’eu vaiva e ch’eu n’ha cret cha quel saja güst am vaiva manà in üna crisa.» El lavuraiva da quel temp in posiziun da cader ill’hotellaria fin set dis l’eivna e 12 fin 13 uras al di ed ha badà cha quai nu pudaiva funcziunar. «Eu d’eira isolà cumplettamaing e n’ha tut cumgià da Google, da Twitter e da tuot ils oters mediums socials. Lura am n’haja decis dad ir in ün pajais sco la China e là amo in üna clostra, in möd cha plü isolà nu’s pudaiva esser sün quist muond.»

Üna vita in askesa

Sco ch’el quinta aint il film staivan els sü cul sulai intuorn las tschinch, lura gniva trenà tuotta di cun üna cuorta posa sur mezdi fin cha’l sulai dschaiva adieu. Davo il trenamaint intensiv daiva alch pitschen da tschaina e tanter las ot e las nouv giaivan tuots a durmir. Quai d’eira il program da minchadi insembel culs muongs da Shaolin. Tschinch mais es stat Biert illa clostra da Shaolin a Shandong. «Pervi da la vita in askesa chi nu d’eira simpla n’haja pensà ün pêr jadas dad ir a chasa ed üna jada vaiv’eu fingià paquettà la buscha. Mo eu m’ha decis da restar. Il grond problem d’eira eir impustüt ch’eu nu pudaiva discuorrer cun ingün causa la lingua e pervi cha quai nu d’eira pussibel es stat tuot fich dür per mai.» Duos maisters da Shaolin chinais han trenà e scolà a Biert e til han güdà our da la crisa.

Il Center da Bainesser a Tschlin

«Cur ch’eu n’ha cumanzà a badair quant bain cha quai fa m’es gnüda l’idea da spordscher quai eir in nossa regiun in Engiadina Bassa. Impustüt causa ch’eu vaiva l’impreschiun cha’l bsögn saja avant man eir pro no.» Biert es tuornà frisch e san in Engiadina cun l’idea da fundar a Tschlin ün Center da Bainesser. Là instruischan uossa duos maisters chinais qigong, tai chi e kung fu illa chasa da scoula veglia ed illa sala polivalenta. Il Center da Bainesser ha però eir portà a Tschlin üna tscherta tensiun. Ils abitants ed eir ils scolars da Tschlin d’eiran adüsats da dispuoner da las localitats libramaing ed uossa ston els tour resguard al center e quai ha vuglü ün temp d’adüs. In discussiuns intensivas s’han els lura as chattats ed intant s’ha la situaziun ün pa calmada. «Il problem cha no vain uossa es cha’ls duos maisters ston bandunar la Svizra davo ün tschert temp e no nu savain scha quels pon restar pro no», ha dit Biert. Els sun in contact cul chantun e cun Berna. Cha là nu gnia trattada documainta ün mez on avant cha’ls contingents scroudan, ha dit il manader dal Center da Bainesser, «ed uschè savaina pür cuort avant schi dà üna prolungaziun dals permiss da lavur o na.» Adonta da quistas difficultats vezza il capo da Valsot Victor Peer la chosa eir in möd positiv. «Schi’s guarda che cha tuot maina cun sai schi craj eu cha quai saja precis quai cha no lessan. I vain pro glieud per giodair la quietezza, quai cha no pudain eir spordscher, e no nu vain da fabrichar ingünas infrastructuras. Quai cha’l Center da Bainesser spordscha es collià cun quietezza e cun meditaziun e s’affà qua a Tschlin.