Arranschaments culturals
da Nadal en Val Lumnezia

(mc) La Fundaziun da cultura Lumnezia envida questa sera, ils 14 da december 2018 allas 20.00 ad ina prelecziun cun accumpignament musical ella Casa d’Angel a Lumbrein. La giuvna autura lumneziana Asa S. Hendry (19) prelegia ord siu niev roman «Sin lautget» cumparius dacuort ella Chasa Editura Rumantscha. Ella vegn accumpignada musicalmein dil cantautur tuatschin Pascal Gamboni.

La sonda dils 22 da december 2018 allas 19.30 suonda ella Casa d’Angel a Lumbrein la vernissascha dall’exposiziun d’unviern cun concert ed aperitivo. La giuvna cantautura lumneziana Sarah Clavadetscher conta per romontsch e per engles siu program intitulaus «She, York». Per l’emprema gada vegn la Casa d’Angel era aviarta duront igl unviern cun ina cuntinuaziun dall’exposiziun «Midadas/Wandel». La curatura dalla Fundaziun Capauliana Chantal Störmer ha concepiu ina nova schelta da maletgs e fotografias dalla Val Lumnezia cun il focus special silla electrificaziun, era en connex cul giubileum da 100 onns Ovra electrica Lumbrein (1919–2019).

Da s. Gion, ils 27 da december allas 19.30 envida la Pro Cumbel alla sentupada musicala tradiziunala denter Nadal e Daniev. A cooperar al concert public ch’ha liug en baselgia parochiala vegnan uonn il Chor mischedau Vignogn sut la direcziun da Gieri Spescha ed in terzet instrumental. Suenter concert envida la Pro Cumbel jasters e dumiastis ad in aperitiv da sentupada sin cadruvi. Venderdis, ils 28 da december allas 19.30 ha in concert cun las «Treis sonatas dil misteri» liug en baselgia parochiala a Lumbrein. Ei setracta digl emprem da treis concerts ella retscha dallas sonatas inspiradas dil s. Rusari dil cumponist baroc H. I. Biber. A cooperar vegnan Hedwig Delchlin (violina) e Gilles Maitre (viola da gamba). Sur Dirk Jasinski ha procurau pil text, Tobias Heinisch fa in’introducziun culturhistorica.

E buca d’emblidar. Era uonn ha il tradiziunal Marcau da Daniev en Val Lumnezia liug, quella gada ei Degen en tur. Numerus expositurs selegran era uonn dalla viseta e dalla sentupada denter indigens e hosps da vacanzas. Cun quella caschun vegn il teaterist Roman Weishaupt a presentar allas 13.00 ed allas 15.00 en halla plurivalenta l’idea d’in project pli grond da teater el liber, planisaus per igl onn 2021.