Cupitgaus da 
scala giu e morts

(poca) La mesjamna suentermiezgi ei in um curdaus a Laax d’ina scala giu ed ei seblessaus vid il tgau. La gievgia endamaun ei quel morts en consequenza dallas blessuras. Igl um da 93 onns haveva badelau neiv giu d’in tetg d’in baghetg. Cuort avon las duas ei quel descendius dil plantschiu egl intern dil nuegl d’ina scala giu. Per motivs nunenconuschents ei igl um cupitgaus bunamein giudem la scala ed ei seblessaus grevamain. In’equipa d’ambulanza ha tractau igl um el liug e transportau quel el spital cantunal a Cuera. L’autra damaun ei il blessau morts en consequenza da quella cupitgada. La Procura publica e la polizia cantunala interqueran il cass.