Envidont, cumadeivel e clar

(anr/abc) Ier ha il directur dil Spital regiunal Surselva presentau la novissima renovaziun ch’il menaschi ha fatg ils meins vargai. Igl ambulatori ella secunda alzada remplazza treis combras cun letgs staziunars. Il settember 2017 han ins aviert la nova partiziun dallas pigliolas e maternitad, il november ha il spital presentau il niev center MRI. Ed ussa puspei ina midada pli gronda el Spital regiunal Surselva. Il directur ha mussau il niev center ambulant. Na, in center ambulant seigi buca la partiziun d’urgenza, declara Marcus Caduff. Pazients en situaziuns d’urgenza, per exempel tier accidents ni malsogna acuta, vegnien retschevi dil survetsch d’urgenza. En quella partiziun fan ins la triascha e leu decidan ins tgei far e co tractar.

Da 75 sin 63 letgs

In ambulatori seigi tut enzatgei auter, metta Caduff el clar. Il directur dil Spital regiunal Surselva ha presentau ier il niev ambulatori. Ella secunda alzada dil tract vest dil spital han ins luvrau la stad vargada. «Leu havein nus investau 700 000 francs», gi Caduff. Il niev center ambulant disponi da diversas stanzas da consultaziun e cussegliaziun. Quei ei stau pusseivel cun reducir il diember da letgs staziunars da 75 sin 63. «La politica giavischa la tendenza tenor il motto ambulant avon staziunar», explichescha il cusseglier guvernativ designau. Naven digl 1. da schaner 2019 astgan tschun tractaments ch’ins fageva entochen ussa staziunar, pia cun dimora da plirs gis en in letg da spital, vegnir fatgs mo pli ambulant. Pil Spital regiunal Surselva munta quei ch’ins hagi 75 cass staziunars dameins, e cunquei era dameins dimoras ellas combras dil spital.

Quella tendenza cuntrastescha cugl augment da tractaments ambulants. Ina retscha da miedis specialists vegnan regularmein mintg’jamna ina ni duas gadas el spital regiunal a Glion per tractar lur pazients. Igl ambulatori niev ch’ins ha scaffiu ella secunda alzada survescha a silmeins tschun spartas medicinalas. Per tractar pazients ell’angiologia, oncologia, pneumologia, cardiologia, diabetes, cussegliaziun da nutriment e tractament da plagas drova ei buc exnum letgs da spital.

Clar ch’ei drova letgs, denton mo ch’il pazient sappi scher giu e schar tractar dil miedi e dallas persunas dalla tgira. Duas stanzas ein reservadas per la chemoterapia. En quellas survegnan ils pazients las infusiuns citostaticas, pia il liquid che cumbatta tumors e carcinoms. Pazients che piteschan da certas malsognas dil cor, dil lom ni dallas aveinas ston buca pli restar en spital. Els vegnan pil tractament, e suenter ina ni pliras uras san els returnar a casa.

Dapi ch’ins ha inaugurau 1986 il spital niev ha il svilup ella medischina reduciu las dimoras en letgs dil spital. La fin da november han ins saviu arver il niev center ambulant. Cun realisar quei project han ins saviu adattar las structuras da menaschi. Tgi ch’ei en tractament tier in miedi specialist pervia dallas diversas malsognas sa ir en in center niev modern e clar. La stanza da spetga dil center ambulant han ins decorau cun ina tapeta gronda che cuviera l’entira preit. Ins spetga e para d’esser sin in lautget sur la Ruinaulta. El niev center ambulant dil Spital regiunal Surselva han ins dil reminent era saviu dar in suttetg definitiv al survetsch da dar saun ch’ei regularmein a Glion. Quel ha stuiu circular ils davos onns d’in liug a l’auter.