«In di da legria per la regiun»

Da Hans Huonder / anr

Struschamein dus onns suenter l’entschatta dallas lavurs da construcziun sa ina part dil Catrina Resort a Mustér vegnir aviarta. En preschientscha da biars hosps ei l’avertura ufficiala sesplegada ier avonmiezdi. Igl unviern ei arrivaus e cun el l’escha aviarta dil niev resort alla staziun da val dallas Pendicularas Mustér SA. La gronda part dils 65 milliuns francs calculai pigl entir cumplex ei investada. Naven dad immediat stattan duas casas cun 40 habitaziuns, il hostel cun 110 letgs ed ils dus restaurants Stiva Ursus e Chevrina a disposiziun als hosps da vacanzas sco era in modern sectur da wellness. Leutier vegn il plaunterren cun la stizun dil Coop. Las quater ulteriuras casas vegnan aviartas successivamein l’auter onn. «Cura che nus havein cumprau las pendicularas havein nus saviu ch’ei drovi ulteriurs letgs caulds, surtut suenter che plirs hotels han serrau. Uss ein els realitad», ha igl investur Marcus Weber puntuau alla fiasta d’inauguraziun. Cusseglier guvernativ Jon Domenic Parolini ha plidau d’ina biala e plascheivla investiziun ed il president communal Robert Cajacob ha puntuau: «Quei ei in di da legria per la destinaziun, gie per l’entira regiun.» Cul resort scaffescha igl investur buca mo infrastructura per hosps da vacanzas, mobein era plazs da lavur, numnadamein rodund 20.

Pagina 3