Vouschs scu anghels

DA GION NUTEGN STGIER / ANR

Cant frestg, canzungs interpretadas cun bler plascheir, melodias tgi laschan sa legrar sen Nadal e 50 unfants tgi on attratg la simpateia digl public cun sa preschentar an ena moda fitg simpatica sen tribuna. Chegl las lengias grassas digl gi da Nadal da marde passo a Savognin. Treis scenas tgi on fatg attent alla bagnstanza da nossa societad, agl pac chito tar la nateira ed alloura tgi sen chest mond vign er de per de angulo ed angano. La punt tranter mintga scena on igls 50 unfants fatg cun canzungs da Nadal tgi èn eidas fitg a cor cun aveir igls scolars e la scolaras vouschs scu anghels. La steila da Nadal, ella ò alla fegn finala mano igls unfants sen la dretga veia. Chegl siva tgi ella ò vasia tgi bagnstanza, respect vers la nateira e stema tar mintga carstgang mantgan adegna daple sen chest mond ed er tar nous. Schinavant resumo igl cuntign digl gi da Nadal, mess an pleds ed insceno dallas scolastas cun la reschia da Domenica Steier. Blera veta agl toc on alloura do las melodias messas an tung da Claudio Steier, el tgi ò er gist accumpagnea igl cant agl clavazign.

Simpel maletg da tribuna

Allas scolastas è reuschia bagn da metter igls unfants aint igl center, graztga agl simpel maletg da tribuna e cun renunztgier a bleras requisitas. Adattada è la culissa neida agl cuntign digl gi, uscheia tgi dava en hotel, en pêr tgesas, en gôt ed en tschiel azur cun la steila da Nadal. Er chegl tgi pertotga costums digls unfants ins ò laschea blera libertad ad els sezs. Chegl ò cunzont musso fitg bagn tgi er noss unfants èn oz multiculturals, averts e sainza retign. Singuls unfants eran bagn vistgias scu anghels, chegl tgi totga tar en gi da Nadal. Oters signifitgivan las bleras steilas tgi suandavan alla steila da Nadal ed er cò ins è sto decent, modest e betg surfatg. Totpiglia on tuttegna betg mantgea las bleras calours tgi totgan tar igl advent e tar Nadal, uscheia tgi l’ambianza da chel taimp avant la festa dalla gleisch era er preschainta sen tribuna.

Bung lungatg e 
buna pronunztga

Crudo an ureglia è tgi igls unfants on gia ena fitg buna pronunztga e tgi discurria è nia en bung rumantsch. An chella tgossa on las scolastas Domenica Steier, Sara Cadotsch e Ramona Imper fatg fitg buna lavour. Vasia ins ò er bagn tgi igls scolars e las scolaras on giuia lour rollas an moda naturala, cun persvasiun e cun ena legreia. Gist chella avertadad da mintgign ò anc do agl gi da Nadal en bol pi singular ed ena noda pi expressiva. Ensatge ò er betg mantgea e chegl è tgi mats e mattas savevan lour texts ordafora ed er chegl tgi pertotga mimica e muvimaint on els persvas.

Canto è nia cun en gost

Da metter igl cant aint igl center digl gi da Nadal ò naturalmaintg do anc en pi bel vistgia all’antiera producziun. Canto è nia cun en gost, cun ena frestgezza e plagn armuneia. Las vouschs fegnas digls mats e dallas mattas on an en colp gudagnea la simpateia digl numerous public. Las melodias plagn calour on igls 50 unfants interpreto cler, sober e cun ena unitad. Mantgea ò er betg igl temperamaint tgi ò do allas melodias anc daple veta ed ambianza. Propi anc pi veiv ègl nia sen tribuna vers las fegn digl gi da Nadal cura tgi è nia canto cun vetiers la dretga «performance», chegl tgi totga oz tar en chor d’unfants. Tot an tot en gi da Nadal tgi ò fatg bler plascheir e chegl a vigl e gioven e tgi mareta igl predicat: excellent.