Chastè per proteger 
il cor da glatsch

(rtr) Radund 300 scolars da l’Engiadin’Ota ed il Puschlav han fabritgà quest atun il Ice Stupa Palace a Morteratsch. In project che duai sensibilisar per il tema aua. Sonda ha gì lieu l’inauguraziun. Avant dus onns ha il glaziolog da Samedan Felix Keller fabritgà l’emprim stupa da glatsch da l’Europa en la Val Roseg. L’onn passà è lura vegnida fundada la societad Ice Stupa International ed in entir vitget da stupas è creschì a Morteratsch.

Quest onn ha Puntraschigna giavischà d’integrar ils uffants. Perquai han Felix Keller e l’architect Conradin Clavuot decidì da fabritgar in chastè. Anc n’è betg l’entir chastè surtratg da glatsch – dad ina vart dad ina stanza radunda ed auta pendan damai chandailas da glatsch, da l’autra vart ves’ins anc la construcziun da salesch.

Cun radund 300 scolars da l’Engiadin’Ota e da la Val Puschlav han ils dus umens damai fabritgà quest atun la construcziun per il Ice Stupa Palace cun salesch. La finamira era da proteger il cor da glatsch cun in grond chastè enturn ed enturn.

La sonda è il chastè vegnì inaugurà. L’attracziun principala era la pussaivladad d’ir en il stupa protegì cun chapellina e cun charpellas vi dals pes. La construcziun da salesch è gia per gronda part surtratga cun glatsch, dal palantschieu sura pendan millis da chandailas da glatsch.

Entant ch’il stupa da glatsch a Morteratsch duai «mo» sensibilisar per la tematica aua èn ils constructs a Ladakh en India, nua ch’els èn vegnids inventads, reservuars d’aua per ils purs tant la stad sco er l’atun.