Daniel Fust – nov CEO

(cp) Il Cussegl da la Banca Chantunala Grischuna (BCG) ha elegì Daniel Fust sco nov CEO. El surpiglia il presidi da la direcziun e qua tras la direcziun operativa da la banca per l’emprim d’october 2019. Il medem mument è Martina Müller-Kamp, manadra da l’investment center, daventada successura da Daniel Fust. Ella vegn a far part davent dal 1. d’october en sia nova funcziun da la direcziun da la fatschenta. Daniel Fust è dapi 2012 commember dal directori e manader da l’unitad fatschentas da la fiera. Da 2002–2012 ha el timunà il sectur risk management e da 1997 fin 2002 era el manader da la partiziun treasurty/cash management. Il spezialist cun il diplom federal da banca, ch’ha 52 onns, abitescha cun sia famiglia a Panaduz.

«Nus ans legrain da pudair preschentar cun Daniel Fust in successur intern per Alois Vincenz. Daniel Fust dispona tras sia persunalitad, experientscha e vasta savida da premissas idealas per pudair dumagnar cun success las sfidas», constatescha il president da la BCG, Peter Fanconi. «Jau ma legrel da pudair surpigliar cun l’entschatta d’october 2019 la direcziun dad ina banca sauna e dinamica. Per correspunder il meglier als basegns da nossas clientas e noss clients vegnin nus a schlargiar vinavant ils servetschs. Latiers s’audan per sumeglia la fatschenta da plazzaments sco era schliaziuns digitalas», di Fust.

Martina Müller-Kamp (1970) daventa manadra da l’unitad da fatschenta: prestaziuns per la fiera. Ella ha entschavì 2008 sco manadra da l’asset management. Dapi 2015 timuna ella il center d’investment da la BCG ed è commembra da la direcziun. Suenter avair studegià economia a Bonn ha ella frequentà en il rom d’in barat la «Helsinki School of Economics and Business Administration». 1999 doctorescha ella (dr. rer. oec.) a l’Universitad da Bochum. Cun sia cumpetenza en la strategicamain impurtanta fatschenta da plazzaments cumpletescha Müller-Kamp optimalmain la direcziun da fatschenta davent da l’entschatta october 2019. Il Cussegl da la banca e la direcziun da la BCG sa legran ch’ins haja survegnì cun Müller-Kamp ina fitg qualifitgada candidata sco successura da Fust.