Emprimas sumbrivas

Dad Andreas Cadonau / ANR

La crudada a tschep da las Ovras da Zervreila succeda en 17 onns e gia uss sa posiziuneschan las ovras per las tractativas cun chantun e vischnancas da concessiun. La fin da l’emna passada han las radunanzas communalas da trais vischnancas da concessiun da las Ovras da Zervreila, numnadamain Val, Stussavgia e Lumnezia, acceptà duas novas cunvegnas cun ils possessurs da las ovras.

Ina da quellas segirescha las investiziuns da las ovras en ils indrizs enfin l’onn nua che las ovras crodan en possess da las vischnancas da concessiun e quai succeda tar las Ovras da Zervreila l’onn 2037.

Percunter retschaivan las vischnancas da concessiun il medem dretg sco il chantun da manischar lur energia da participaziun a partir da l’onn 2023 tenor agen gust.

Enfin alur han las Ovras da Zervreila in dretg da precumpra. Per il president communal da Val, Stefan Schmid, èn omaduas cunvegnas d’avantatg per las vischnancas da concessiun. La vischnanca da Val è l’impurtanta vischnanca da concessiun da las Ovras da Zervreila cun la pli gronda cumpart dad energia da participaziun. Acceptar las duas cunvegnas cun las ovras ston dentant anc las ulteriuras vischnancas da concessiun cun pitschna participaziun.

pagina 3