Fegn tragica per «Alexei»

DA GION NUTEGN STGIER / ANR

Igl teater musical «Alexei» rachinta an maletg, tung e solt la curta veta digl davos fegl digl zar. Allas persungas preschaintas sen tribuna è gartagea an moda singulara d’intepretar la fegn dalla famiglia e sies imperi. Igl public è sto entusiasmo dalla preschentaziun. An sies pled d’introducziun ò Giovanni Netzer, igl intendant digl Origen Festival Cultural, detg tgi l’istorgia inscenada aint igl bietg da teater a Riom, la «Clavadeira», geia bagn betg propi accord cugl taimp d’advent. Tuttegna vegia ella ena tscherta identitad cun bler da tot chegl tgi capeta da preschaint sen noss mond. La Russia ed igl Grischun, chegl seia decennis er sto ena veira amour e perdetga da chella seian anc oz gist an Russia ed er an noss cantun blers bietgs e monumaints. Netzer ò er menziuno tgi igl scazi cultural e litterar dalla Russia seia immens vast ed er adatto per nous scu Grischuns.

En rachintader 
da vaglia

Igl maletg dalla tribuna è scu adegna fitg simpel tar Netzer ed a requisitas vign renunztgia. Tuttegna tgapescha igl aspectatour bagnspert tgi igls quaders an calour blocler signifitgeschan igl palast dalla famiglia digl zar.

La punt tranter las scenas cun cant, solt, muvimaints e mimica fò Maximilian Vogler cun rachintar an en fitg bung lungatg e cun ena pronunztga clera l’istorgia dalla famiglia digl zar e digl sies fegl «Alexei». El fò chegl schi particular tg’ins spetga cun gronda tensiun alla cuntinuaziun dall’istorgia. Vogler è alloura er chel tgi stat igl pi manevel ad «Alexei» e chel tgi è igl pi serious partenari cun giuier la rolla digl scolast franzos Pierre Gilliard tgi ò instruia igl fegl digl zar.

Ensacu simbolic è alloura er tgi igl scolast interpretescha cun la sia vousch da tenor la canzung da cumgea curt siva la mort da sies scolar «Alexei». Ansomma conferma Vogler durant igl antier toc tgi el è betg angal en rachintader da vaglia, mabagn er en tenor cun ena vousch sobra e sonora.

Egn digls numerous matros

Egn digls numerous matros dalla famiglia digl zar è «Nadorny» e chel tgi stat ple u manc adegna segls caltgogns digl gioven «Alexei». Chella rolla è scu fatga per igl bass-bariton Konstantin Ingenpass tgi è ena persunga fegna, ò dantant tuttegna ena vousch scu la pi ferma planta. «Alexei», el tgi è sa tgapescha igl protagonist digl teater musical e tgi vign giuia fenomenal digl actour Antonis Michalopoulos, dat alla preschentaziun la pi ferma expressiun. Igl actour dovra betg en sulet pled persiva, schi real èn sies muvimaints, sies vurdar, sia pagna e sia speranza da tuttegna neir guero da sia malsogna e da sies esser exclus dalla libertad.

Igls chitos dalla mamma

La saltunza Riikkka Läser, ella ò per Netzer igl dretg carisma per giuier la mamma digl gioven mat «Alexei», el tgi vess gia da surpiglier eneda igl antier imperi, è pero mort cun angal 13 onns. Cun vurdar pi stagn an fatscha alla donna digl zar vignan igls sies chitos pigl sies fegl «Alexei» anc pi ferm alla gleisch. Plagn fascinaziun per sies frarign è er la sora Anastasia (Sybille Diethelm) tgi canta per «Alexei», signia dalla mort, melodias romanticas e tgi laschan tuttegna sperar sen en migler taimp.

Tungs fegns e tungs 
plagn ramour

Graztga alla musica fegna da Modest Mussorgsky interpretada agl clavazign dad Alena Sojer survign l’ovra igl dretg vistgia musical. Gist igl cuntrari è alloura la musica tgi Miguel Angel Garcia Martin fò cun igls instrumaints da percussiun. Migler sa laschan las scenas da brutalitad, angoscha, tema e cumbat cunter veta e mort strousch inscenar. La musica savess betg esser pi differenta e tuttegna ins ò alla fegn l’impressiun tgi ella seia en’unitad per cumplettar l’ovra grondiousa tgi mareta igl predicat: excellent.