La colligiaziun ei reala

(anr/ac) Delegaziuns dalla Val d’Ursera e dalla Val Tujetsch ein s’entupai il vendergis vargau sin il Pass dall’Alpsu per l’avertura ufficiala dil territori da skis communabel. Cun la pendiculara sin il Schneehüenerstock ei la davosa part dil puzzle dalla colligiaziun en funcziun suenter diesch onns da planisar e construir. Per ils participai in mument emoziunal. «Enconuschentamein procuran ils Vallesans magari per fastedis.» L’explicaziun dalla cussegliera guvernativa Heidi Z’graggen curdada il vendergis vargau alla staziun da val dalla nova pendiculara sin il Schneehüenerstock al Pass dall’Alpsu ha procurau per ina risada. Natiralmein che la cussegliera guvernativa dil cantun Uri ha buca manegiau las elecziuns dil cussegl federal gest vargadas, mobein il meinaproject dalla colligiaziun dils territoris da skis, Peter Furger. Enteifer la fasa da planisar ha el giu fatg attent la cussegliera guvernativa a munconzas dall’emprema projectaziun. «Aschia va quei buc.» La damonda sch’ei va ni buc ei probabel setschentada pliras gadas enteifer ils siat onns nua che l’entira colligiaziun dils dus territoris da skis ei vegnida planisada cun tuttas examinaziuns e lubientschas. Buca meins che 1300 paginas pupi ein s’emplunadas per stipular las lubientschas necessarias per igl entir project. Ina lavur che meritass, tenor Z’graggen, gia in doctor honoris causa per igl autur, il giurist digl Uffeci federal da traffic, Peter Mayer. Sulet treis onns ha la construcziun cuzzau e Z’graggen ha tschintschau dad in mument impurtont ella historia turistica dalla regiun. Metter en funcziun in niev indrez ed el medem mument arver in territori da skis che colligi dus cantuns, duas culturas e dus lungatgs. La cussegliera guvernativa dil cantun Uri ha buca munchentau dad engraziar a vischnauncas ed instituziuns dad omisduas varts dil cuolm per lur engaschi e la promtadad da sustener las stentas da realisar il project.

Crescher e prosperar

Igl engraziament dalla cussegliera guvernativa ei medemamein ius ad in dils babs dil project, Bernhard Russi. Lez da sia vart ha definiu plirs babs stai involvai da schendrar igl affon e menziunau ina gravidonza magari buca sempla. Ed accentuau il plascher da tuts ch’igl affon seigi naschius. Ussa denton suondi in’impurtonta fasa, numnadamein da procurar ch’igl affon creschi e prospereschi. E secapescha ch’igl investur Samih Sawiris ha retschiert igl engraziament per sia veglia e sia potenza finanziala da metter en pei l’infrastructura. Per el ei siu affon, il resort da vacanzas ad Andermatt, gia s’avanzaus aschi lunsch ch’el basegni buca pli il sustegn e pareri dil bab, ha igl investur manegiau. Sawiris ha buca sulet menziunau la colligiaziun dils dus territoris da skis per impurtonts, mobein l’avertura dad in ulteriur hotel ad Andermatt. Siu engraziament ei ius alla populaziun dad Andermatt ch’hagi duront biars onns demussau capientscha per las lavurs da construcziun e plascher ha igl investur dall’attaschadadad viers sia persuna ch’el senti vinavon davart dalla populaziun indigena.

Mument commuentond

In mument commuentond era per il meinagestiun dalla Arena da skis Andermatt-Sedrun Silvio Schmid da schar tagliar il pindel tgietschen ed aschia buca sulet metter en funcziun il niev stabiliment da transport dil Pass Alpsu entochen sin il Schneeeühnerstock, mobein dad arver il territori colligiau. La raspada ha silsuenter astgau far il viadi sin passa 2600 meters sur mar e guder il vast horizont alpin en vestgiu d’unviern. Il meinaproject Peter Furger ha explicau al pei dil Schneehüenerstock las stentas da construir e l’intenziun dall’interpresa da sviluppar quei liug al center dil niev territori da skis, accessibels da stad ed unviern cun ina buna purschida gastronomica. E quella purschida han ils hosps gest astgau degustar il vendergis vargau.