Nagin plaz da 
podest per Cologna

Il Russ Jewgeni Below ha gudagnà a Tavau en la cursa sur 15 kilometers stil liber. Dario Cologna è vegnì sin plaz 15. Il Russ Below ha cumbattì cunter il Franzos Maurice Manificat ed ha gudagnà la cursa cun in avantatg da 0,9 secundas. Martin Sundby da la Norvegia cumplettescha il podest. Tar kilometer 8,2 era Cologna anc sin ina plazza da podest. Be otg secundas era el davos ils pli sperts. Dentant en la segunda mesadad da la cursa ha el pers bler temp. Sulet sin ils davos 1,8 kilometers è el crudà da plaz 11 sin il plaz 15. Uschia sto il Jauer vinavant spetgar sin sia emprima victoria a Tavau.

Marcel Hirscher ha gudagnà il slalom gigant ad Alta Badia. Quai cun in avantatg da passa 2.5 secundas sin ils dus Franzos Thomas Fanara ed Alexis Pinturault.

Sin il podest: 1. Marcel Hirscher (Austria); 2. Thomas Fanara (Frantscha) cun +2.53; 3. Alexis Pinturault (Frantscha) cun +2.69). Ed ils Svizzers: 8. Loïc Meillard, 9. Thomas Tumler,15. Gino Caviezel, 22. Elia Zurbriggen. Marco Odermatt è crudà or. Suenter l’emprim percurs era el anc sin il terz plaz.

La staffetta da biatlon da la Svizra ha cuntanschì tar la cursa da 4 x 6 kilometers a Hochfilzen il plaz 12. La davosa curridra da la staffetta Susanna Meinen ha stuì rechargiar duas giadas ed è uschia crudada dal plaz 2 sin plaz 6. La Bernaisa ha silsuenter anc obtegnì trais rundas da chastì. Il siemi d’in podest era uschia a fin. La fin finala han ellas cuntanschì il plaz 12. Gudagnà ha l’Italia avant la Svezia (+8.4) e la Frantscha (+11.8). Era la staffetta da la Germania n’ha betg persvadì.