Cultura cristiana contra 
fundamentalissem islamic

(cp) La Partida cristiandemocratica (pcd) svizra ha priu posiziun – sut il tetel «Stadi constituziunal e fundamentalissem» – principalmein encunter il fundamentalissem islamic. Ella vul instradar ina debatta sur da quei tema tabuisau. Las pretensiuns ein claras: Negina scharia, neginas societads parallelas, negins predicaturs ch’ein per la violenza, neginas prescripziuns discriminontas el sevestgir e las medemas schanzas da sescolar per tuts.

En l’introducziun renda la pcd attents alla muntada dil stadi constituziunal svizzer ed agl uorden actual per la societad. Quei seigi l’ierta da nossa cultura derivonta dil cristianissem e giudaissem ed era da nies sensori politic da surventscher conflicts historics-religius cun raschuneivladad.

La pcd stat davos la libertad da religiun. Quei seigi denton buc ina caussa privata e suttastetti ella publicitad a diversas reglas. Nua che quei sappi buca vegnir garantiu el stadi ed ella cuminonza religiusa constatescha la pcd ina tendenza fundamentalistica. Tier ella setract’ei da conflicts, sedai da diversas fuormas digl islamissem viviu. Cheu drovi ei ina debatta. Quella vegni denton tabuisada e quei seigi prigulus. La pcd sedistanziescha claramein da quei fundamentalissem. Cuminonzas islamicas han dad esser organisadas transparentamein e tenor dretg constituziunal. Per questa integraziun ei buca mo il stadi responsabels. La pcd spetga era da quellas cuminonzas in clar confess alla constituziunalitad. La damonda dalla renconuschientscha ufficiala dallas cuminonzas islamicas e la scolaziun dils imans – ch’ei drova pil mument buc – ston ils cantuns reglar era cun examinar las structuras finanzialas da quellas organisaziuns.

Cun quei catalog da posiziun vul la pcd lantschar ina debatta davart las valetas centralas da nossa societad. Il medem mument postulescha ella ch’il cussegl federal pondereschi davart mesiras co integrar diversas culturas.