Cun fiug e slontsch

(anr/abc) Ina massa glieud ha visitau sonda a Sagogn e dumengia a Glion ina sera da divertiment cun varga 120 giuvenils ed affons. Duas formaziuns dalla Foppa han envidau alla show ritmic-musicala. Igl onn proxim eis ei 15 onns dapi che Sonia Lombriser da Glion ha entschiet ad organisar cuors da saltar per affons. «Dance Fun» porscha saults moderns en gruppa e cun coreografia. Igl ei denton buca saults cun musica populara. Il cavazzin «popular» ei dil reminent semidaus cumpletamein ils davos onns. Popular ei musica da pop e rock, hiphop, breakdance, zumba ed auter. Saltar ei cumbinau cun restar en fuorma, esser fit. Cun in team da siat menadras e dus menaders ha Lombriser baghegiau si in’instituziun profilada. Naven dalla gimnastica per mummas cun affons pigns tochen tier cuors da piloxing dat ei ina massa pusseivladads da semover. El decuors dils onns ha la giuvna mumma purschiu a massa mattatschas dalla Foppa ina buna moda d’exercitar ritmica e moviment.

Ils quater schumbraders

Actualmein frequentan varga 100 affons e giuvenils ils exercezis regulars tier «Dance Fun». Sonda ha quell’instituziun regiunala cooperau culla Musica giuvenila Foppa (MGF). La sonda a Sagogn e la dumengia a Glion ein las salas stadas pleinas. Geniturs e fargliuns, tattas e tats, augs ed ondas, han vuliu veser la show cul tetel «BrassFun&DanceBand». Ell’emprema part ha la MGF presentau in concert «unplugged», pia in program cun musica da brass. La musicanta Linda Derungs ha presentau ils tocs melodius-ritmics. Igl onn vargau haveva la formaziun entschiet ad exercitar cul dirigent Serafin Cadruvi. Quel capescha oreifer da motivar ses 26 musicants e musicantas. Ils tschun tocs ch’igl auditori ha gudiu han tschaffau, ins ha sentiu ch’ils giuvenils ein ambizius e ch’els han plascher da far buna musica. In pulit nivel han els contonschiu. Cul toc «festive prologue» ha il concert entschiet, lu ha la MGF sunau il «Dakota» da Jacob de Haan. La cumposiziun ei repartida en tschun parts e sebasa sil pievel dils Indians cun lur veta e mintgagi. Parts sentimentalas e dinamicas sebrattan. Cadruvi e sia formaziun han mussau in pulit nivel cun quei toc. Els han cuntinuau cun «Edelweiss» da Jean-Pierre Fleury e cun «Blueme« da Polo Hofer. Quei toc arranschaus da Vince Colter cuntegn in bi duet per eufoni e bariton. Avon che la Musica giuvenila Foppa ha concludiu sia part han Eric Derungs, Roman Casutt, Gian Wolf ed Andrin Schöller divertiu cun in toc per schumbraders. Els han fatg la punt tier la part cullas saltunzas. Cun lur instructuras Muriel Seeli, Laura Tateo, Luke Gustafson, Joana Bastos, Julia Zinsli e la menadra da DanceFun, Sonia Lombriser, han las varga 90 mattatschas da quater tochen 15 onns presentau en gruppas da vegliadetgna lur saults. Ina gruppa ha mussau ina show da breakdance. Las pintgas e grondas acrobatas dil moviment han saltau tenor musica cun nums sco «Remix», «Body», «Circle» ed auters. Igl ei ina pulita prestaziun d’emprender ils moviments d’ina coreografia che cuoza pliras minutas.

Cun fiug e slontsch ha mintga gruppa presentau sia part. Sco punct culminont han treis d’ellas saltau buca pli tenor musica dallas boxas, mobein cun accumpignament live dalla MGF. Il publicum ha secapescha giavischau supplements. Sco Lombriser ha sincerau han las mattatschas, las instructuras ed ella sezza giu grond tschaffen da cooperar en quei project da concert culla Musica giuvenila Foppa.