Fanestras d’advent a Sent

DA BENEDICT STECHER / ANR

Las quatter eivnas d’advent significhan ils 4000 ons cha’ls cristians han spettà a la naschentscha dal Spendrader. A Sent ed in oters cumüns algordan bellas fanestras bain decoradas al temp d’advent. Advent, insè adventus domini, voul dir l’arriv dal Salvader. La prüma dumengia d’advent, ingio cha’ls blers impizzan la prüma chandaila, crouda pel solit tanter ils 27 da november ed ils 3 da december e finischa culla quarta dumengia, la saira soncha dals 24 da december. Las fanestras d’advent i’ls cumüns da la regiun sun in quella fuorma sco chi vegnan preschantadas hoz plüchöntsch üna tradiziun nouva. Intant chi’s vezzaiva giò la Bassa fingià daspö blers ons fanestras decoradas vain fat quai pro no in üna fuorma nouva per s’algordar al temp da preparaziun. Sper las fanestras decoradas as vezza pro no eir decoraziuns da tuot gener pro las portas d’entrada da las chasas. Pero pro tuottas duos fuormas da decoraziun as tratta adüna da glüms e glüminas agreablas chi dessan preparar ils umans sülla festa da Nadal. Per blers es l’advent ün temp paschaivel e quiet, per oters ün temp hectic ingio chi vegnan spais blers raps per regals ed eir per otras robas. Intant cha plü bod d’eira l’advent ün temp da curaisma es quai hoz ün temp cun ün möd da viver schmasürà. Intant cha bap e mamma faivan insembel culs uffants ün cranz d’advent cun quatter chandailas as poja cumprar quels in tuot las fuormas. Ils temps s’han müdats e cun quels eir ils preparativs dürant il temp d’advent.

Las decoraziuns d’advent a Sent

Schi’s fa actualmaing üna spassegiada tras il cumün da Sent o eir tras oters cumüns da la regiun schi’s poja müravgliar las fanestras e las decoraziuns d’advent fattas cun gronda premura ed amur. Sün l’idea s’esa gnü a Sent avant quatter ons davo l’ultima saira da «A Sent be rumantsch». Ün per duonnas dal cumün han discuttà co chi’s pudess dar al cumün üna taimpra festiva. Svelt s’esa lura gnü sün l’idea da s-chaffir fanestras d’advent. Il resultat es stat surprendent ed ha promovü il vair segn dal temp d’aspet al Salvader. Gronda parada fa a Sent eir il clucher da la baselgia inglüminà chi cumplettescha las decoraziuns in möd natüral. Indigens e giasts lodan adüna darcheu il bel möd da’s preparar süllas festas chi stan avant porta.

La preparaziun d’advent es fich veglia

Il temp d’advent illa fuorma d’hoz va inavo i’l settavel tschientiner e gniva nomnada «tempus adventus Domini», quai chi voul dir l’arriv dal Salvader. Las quatter dumengias d’advent as dedicheschan a differents temas. La prüma dumengia algorda l’umanità a l’appariziun da Cristus a l’ultim di, dimena a l’apocalipsa ed al plü giuven tribunal. Pro la seguonda e terza dumengia sta Johannes il battiader i’l center.

El es l’ultim profet chi ha preparà l’arriv dal Spendrader. La quarta ed ultima dumengia avant Nadal as dedichescha a Maria, la mamma da Gesu. Sco chi vain dit pendaiva il prüm cranz d’advent da l’on 1925 illa baselgia catolica a Cologna.