Frequenzas carschentas

(anr/abc) Las frequenzas dils ciclists ein carschidas per varga 30 pertschien, menaschis da bogn e pendicularas ein stai pleins sco aunc mai, las pernottaziuns els hotels ein carschidas. La stad 2018 seigi stada sensaziunala, communicheschan ils turistichers da Flem-Laax-Falera. «Ei schabegia fetg bia denter Glion e Trin», ha il directur da Flem Laax Falera Turissem, André Gisler, exclamau l’jamna vargada a caschun dalla sentupada culla glieud ch’ei engaschada el turissem. A hoteliers, ustiers, responsabels da parahotellaria ed auters survetschs turistics ha el buca zuppau sia luschezia che la destinaziun ei vidlunder da seposiziunar da niev e da seprofilar cun purschidas novas. A Laax ha la radunonza communala approbau diversas investiziuns en favur dil turissem, a Flem ein talas en vesta e cul Center Stenna dat ei in niev magnet per turissem e survetschs. «Igl ei in’immensa plivalur», ha Gisler getg.

Augment da ciclists

Era ellas ulteriuras vischnauncas stattan ins buca cun mauns en crusch e spetga che zatgei schabegi. Gisler ha era menziunau ils differents premis che Flem-Laax-Falera hagi gudignau uonn, ei seigi stau en gliez connex in onn da records. Aunc mai hagi ei dau tons lauds per la destinaziun, meglier resort da freestyle dil mund, meglier hotel da skis «verd» dil mund, megliera scola da skis e meglier «snowparc» cullas attracziuns da siglir sil Crap Sogn Gion. Buca d’emblidar ei il renum per l’entira destinaziun Flem-Laax-Falera ch’il «Milestone» a Reto Gurtner vala.

«Nus mirein anavos sin ina stad sensaziunala», ha era Christoph Schmidt, il menader dalla gastronomia dalla gruppa Arena Alva SA, declarau als presents. En sia cuorta bilanza dalla stagiun da stad ha el declarau ch’ins hagi registrau in record d’entradas al Lag la Cauma a Flem. Quel han 106 103 persunas visitau la stad vargada da calira, quei ein 21,3 pertschien dapli ch’igl onn precedent. Era la pendiculara da Murschetg–Crap Sogn Gion ei stada occupada pli ch’usitau. Leu han ins registrau 130 442 frequenzas, quei ei in augment da 19,8 pertschien. Tier la statistica dils ciclists han ins giu la stad vargada in augment da 31,2 pertschien. Igl onn 2011 havevan las pendicularas dumbrau 26 538 frequenzas, igl onn 2018 ei quei stau 75 890. Tons ciclists han duvrau ils mieds da transport e las rutas e pistas da velo ella destinaziun Flem-Laax-Falera.

Niev hotel sto seprofilar

La sfida pli gronda dils turistichers ei – e quei fa ils pli gronds quitaus ad els – l’occupaziun dils letgs ella hotellaria. Era sch’il diember da hosps ei carschius en quei sectur per rodund otg pertschien savess l’occupaziun esser megliera. Malgrad quei han ins aviert el Center Stenna in niev hotel. Quel concurrenzescha vinavon ils existents e sforza lezs da s’engaschar aunc pli ferm per las pernottaziuns. In fatg clar ei ch’ils biars hotels existents vivan dils hosps da tschep ch’apprezieschan «lur» hotel sco dacasa temporar duront las vacanzas. En quei risguard sto era il niev hotel «The Hide» seprofilar e gudignar la confidonza dils hosps. Il grond avantatg ch’il hotel da quater steilas ha ei ch’el ei colligiaus direct cullas pistas e cul territori da skis.

Sco ils responsabels dalla vendita da Flem Laax Falera Management SA han declarau deriva la maioritad dils hosps d’hotel dalla Svizra, suandai dils Tudestgs, sil tierz plaz ils Beltgs e sco quarts ils Americans. En connex cullas premissas per la stagiun d’unviern 2018/19 ch’ha entschiet ha il schef-gastronom Christoph Schmidt bunas speronzas. Ins sappi buca star eri e far nuot, il hosp pretendi adina novas attracziuns, ha el confirmau. Suenter ch’ins ha renovau avon dus onns migeivlamein il hotel sil Crap Sogn Gion emprovan ins vinavon d’optimar la purschida. Pli e pli biars turists e hosps vegnan buca pli mo per ir cun skis. L’Arena Alva SA sto considerar ch’els vulan guder tut, ils cuolms, l’aria frestga, l’atmosfera, ir a spass sin sendas d’unviern, guder ina tura cun gianellas ni autras alternativas.

Schizun plazs per luvrar ellas vacanzas en biro porschan ins sil Crap Sogn Gion. Quei tut sper la purschida usitada cun pistas preparadas sco teppis e da tuttas uras, parc da divertiment per snowboarders, cundrezs da transport luxurius, access spert alla reit, divertiment en bars, discos ed ustrias. La purschida a Flem-Laax-Falera ei buca bienmarcau. Quei san ils hosps che selaian carmalar e che vegnan. E quei sentan ils turistichers, els vegnan confruntai cun adina novs giavischs da lur clientella puppergnada.