«In bien fundament pigl avegnir»

Da Hans Huonder / anr

Ils discuors dils davos meins concernent ina pli stretga collaboraziun dils clubs da ballapei en Surselva portan fretg. En in emprem pass vulan ils otg clubs promover communablamein ils juniors. Sco quei ch’igl iniziant dallas discussiuns, René Epp, ha detg enviers l’Agentura da novitads rumantscha suttascrivan ils otg clubs ina cunvegnientscha d’intenziun entochen la fin da quest onn. Silsuenter duein ils reglaments – denter auter pertuccont la finanziaziun dil menaschi – per la «Cuminonza d’interess squadra Surselva» vegnir elavurai e lu approbai. La finamira ei da separticipar al campiunadi da ballapei naven digl atun 2019 cun equipas communablas da juniors D entochen A. Talas squadras han ils clubs gia giu ils davos onns, mo ussa duei era la basa structurala ed organisatoria vegnir profundada e fixada sin pupi. Presidents ed ulteriurs funcziunaris dils otg clubs ein sescuntrai pliras ga ils davos meins per discussiunar davart igl avegnir dil ballapei en Surselva. «En sesez vesan tuts ch’ei fa da basegns da collaborar, la damonda ei mo stada con profund. Ina squadra activa communabla ei denton negin tema il mument», di Epp. Quei era sia finamira primara, mo cun ils resultats contonschi uss eis el era cuntents: «La lavur culs juniors ei segiramein in emprem bien pass. Sin quei fundament savein nus concepir igl avegnir.»

Pagina 3