Refusau il center medicinal

(anr/abc) La radunonza communala da Trin ha giu da sefatschentar gliendisgis sera cun ina tractanda dispiteivla. En siu messadi haveva la suprastonza communala informau ch’in miedi d’ina vischnaunca vischinonta seigi s’interessaus per las localitads vitas el plaunterren dalla casa communala. El endrizzassi bugen leu in center medicinal cun in’apoteca e treis stanzas da terapia. La suprastonza ha viu quella pusseivladad sco ina buna alternativa per augmentar l’attractivitad dalla vischnaunca. Per saver far il contract d’affittaziun havess la vischnaunca stuiu adattar la surfatscha. La suprastonza ha proponiu da lubir per quei intent in credit da baghegiar da 300 000 francs. Cun 30 vuschs gie encunter 72 na e 33 abstenziuns ha la radunonza communala refusau il credit. Il motiv principal ei ch’ei dat a Trin gia ina pratica medicinala, e quei ella vischinonza dalla casa communala.

Las autras tractandas proponidas tenor il messadi ha la radunonza communala discutau, denton buca mess en damonda. Per ina restructuraziun dall’ustria Lag la Cresta ha il suveran concediu in credit da 250 000 francs. Duas dunnas indigenas vulan menar quei menaschi naven digl onn proxim. Per saver far quei, cun lur clar concept gastronomic presentau, drova ei diversas mesiras architectonicas. Vitier ston ins remplazzar en cuschina plirs apparats. Ils 141 presents han era priu notizia ed han approbau il preventiv dil quen current 2019 dalla vischnaunca sco era quel dall’Ovra electrica Mulin. Il quen dalla vischnaunca preveda expensas da 7 407 940 ed entradas da 7 559 500 francs, aschia ch’ei seresultass in surpli d’entradas da 151 560 francs. Medemamein han ils da Trin dau suatientscha alla proposta dalla suprastonza da schar il pei da taglia sco tochen dacheu sin 100 pertschien dalla taglia cantunala. Era la revisiun parziala dalla planisaziun locala ha buca caschunau liungas discussiuns. Votantas e votants han approbau quella adattaziun necessaria pigl avegnir dalla sechentaria da carn Gurtner. Quella sto ademplir certas normas da qualitad decretadas da cantun e confederaziun. L’interpresa drova rodund 210 m2 dapli spazi per logistica ed infrastructura e sto baghegiar vitier il stabiliment existent. La vischnaunca sa cunquei garantir plazzas da lavur en vischnaunca. In’ulteriura revisiun parziala dalla planisaziun locala ei stada necessaria. Per saver rinforzar il center da cuorsa liunga a Trin Mulin ed augmentar l’attractivitad dalla disciplina da biatlon sto in’ulteriura surfatscha vegnir ella zona per sport d’unviern. Quella midada corrispundenta ha la radunonza communala approbau. Lu ha ei dau ina mutaziun ella cumissiun da quen e gestiun. Il designau cusseglier guvernativ Peter Peyer fuva commember da quella. Sco siu successur ha la radunonza communala eligiu Sascha Burkhalter ch’habitescha a Trin Mulin.