Il temps da far tustgets ed ils recepts persuenter el DRG

In di hai jeu dumandau en ina stizun gronda a Glion (per romontsch) sch’ei hagien era scatlas da tustgets. Jeu hai lu survegniu ina risposta ch’ha gidau mei d’anflar il giavischau e sun mezza stada surstada ch’jeu seigi vegnida capida. Jeu vevel da bugen detg «tustgets» e quintavel ch’jeu stoppi lu forsa translatar ei ni dir mams ni creflis. Prima, ils «tustgets» han bandunau ils stretgs cunfins da Rabius.

Vesses vus capiu tgei ch’jeu encurevel? Buc? Ni forsa tuttina schegie che vus enconuschis buc il plaid «tustget»? E forsa mo perquei ch’igl ei uss il temps da far tustgets, e sch’jeu fuss vegnida cun quella damonda da mesa stad vess tgisà gnanc la vendidra capiu tgei ch’jeu enqueri?

Mintgaton capesch’ins enzatgei senza enconuscher mintga plaid. Quei ei in fenomen pratic che motivescha zatgi ch’ei vid emprender in lungatg.

RTR s’intressescha il mument per recepts da tustgets e fa appel da s’annunziar. Ei numnan leu ils grassins, mams, creflis e biscuits. Ualti segir dat ei aunc auters plaids persuenter. Sco affon vess jeu strusch saviu capir ch’ei detti auters plaids per «tustget». Pli tard havein nus affons lu fatg la scoperta ch’ils da Trun ditgien mams e zacu realisau ch’ei detti era glieud che ditgi creflis ni grassins. Aunc pli interessant vegn ei sch’ins arva il computer ed enquera ella reit sur DRG-online il plaid tustget. Lez curregia immediat e muossa vi sil plaid dutsch, erla, malcorv e dastgoin. Tuts artechels descrivan in semegliont product dultsch fatgs ord ina pasta cun frina, zucher, pischada ed ovs. Jeu stoi constatar che «tustget» seigi mo in auter plaid per patlauna (Fasnachtsküchlein). Tenor il DRG derivi il plaid surmiran dastgoin da tas-cha (in Täschchenform). En mia regurdientscha d’affonza ed en mia realitad aunc oz stat il plaid tustget per creflis, mams ni grassins. Sil pli tard cura ch’il DRG arriva tiel bustab «t» vegnan ils ulteriurs detagls dil «tustget» speronza alla glisch (cheu vegness uss il simbol d’ina fatscha curteseivla che ri). Ei vala en tutta cass la peina da fuffergnar el DRG-online, ins anfla bia ch’ins gnanc spitgava, schizun impuls per variar ils recepts da tustgets!

Tresa Deplazes, Schnaus