Uestgiu da Cuera vul vender il 
«St. Johannes-Stift» a Zezras

(cp) Il «St. Johannes-Stift» a Zezras, che s’auda agl uestgiu da Cuera, duei vegnir vendius. Igl uestgiu, la vischnaunca da Zezras e la Fundaziun-purtadra stuessen numnadamein impunder 60 milliuns per modernisar la casa. Il «St. Johannes-Stift» ha ina liunga historia. El ei vegnius erigius sco «Unteres Schloss» el 17. tschentaner dalla famiglia da Rudolf von Salis ed ha era s’udiu a quella 140 onns. El 19. tschentaner fuva el vits cunquei che la famiglia von Salis era morta ora ella 5. generaziun.

1899 ei il casti vegnius vendius alla «Seraphisches Liebeswerk». Igl emprem levan ins far ordlunder ina casa per affons. La finala ei vegniu decidiu da far diever da quei stabiliment sco casa per spirituals basignus che levan passentar leu lur serasontga. 1902 ei la casa vegnida midada entuorn en la fundaziun «St. Johannes-Stift», numnada tenor igl uestg da Cuera Gion Fidel Battaglia (1829–1913).

Da 1903–1939 han fraters da malsauns ord la Baviera menau la casa. Suenter han las soras dominicanas da Glion surpriu per 28 onns la direcziun. 1978 ha uestg Gion Vonderach surdau ad in cussegl d’administraziun da manischar. Naven da lu ein franciscanas d’Oberriet (SG) s’engaschadas, han denton stuiu renunziar alla direcziun muort munconza da persunal. Tochen 2016 ha il «St. Johannes-Stift» surviu sco casa per seniors e da tgira. Las aultas investiziuns ein per la vischnaunca da Zezras ed igl uestgiu considerablas. La fundaziun ha perquei incaricau ina firma specialisada da studegiar tgei ch’ins savessi far ord quella casa. Ins less cattar ina sligiaziun che tegn quen dil casti sco bein cultural.

La pli prominenta cussadenta dil «St. Johannes-Stift» a Zezras ei bein la davosa imperatura Zita dall’Austria-Ungaria stada. Cheu ha ella passentau la sera dalla veta naven da 1962 tochen 1989 ch’ella ei era morta leu.