Far musica – in hobi ella vallada

(anr/abc) Sonda vargada ha la formaziun envidau a siu concert annual. Quel ha la Musica giuvenila Lumnezia dau ella Sentupada a Vignogn. Il temps dallas emprovas ei buca staus liungs. Igl uost ein las musicantas ed ils musicants s’entupai l’emprema gada. Lu han il dirigent Remo Derungs e Rafael Andreoli, il president dalla Musica giuvenila Lumnezia (MGL), saviu beneventar 33 participontas e participonts agl emprem exercezi. El decuors digl atun ei la formaziun s’entupada ad ina fin d’jamna concentrada. Cun meinaregisters han las giuvnas ed ils giuvens mulau e glimau ils tocs, denter quels dètg pretensius. Tgei ch’ils giuvens musicants han empriu en quels treis meins e miez fa surstar. Els han dau in bi concert che cumprova ch’els sunan bugen.

Duas solistas

Buca mo sempels tocs han els sunau sonda vargada al concert annual. La halla dalla Sentupada a Vignogn ei s’emplenida pulit, da tut ils vischinadis ei igl auditori vegnius per tedlar e sedivertir. Cun «Seven Nation Army», il toc culla ritmica che va ell’ureglia da Jack White, arranschaus per musica da brass da Paul Murtha, ei la formaziun marschada sin tribuna. Sco secund ei suandaus «Euphoria», cun quella canzun ha Loreen gudignau 2012 igl European Song Contest per la Svezia. La MGL ha sunau in arranschament da Jan van Kraeydonck.

En tut ha la formaziun giuvna lumneziana sunau 12 tocs. «Oz vegn fatg autruisa musica» eis ei iu tras il tgau tedlond ellas ed els en acziun. Dapi zacons onns suna la musica sut la premurada direcziun da Remo Derungs. Il construider d’instruments e scolast da musica capescha d’animar, adina puspei ha el ideas che motiveschan. Duas da sias meglieras musicantas han sunau il solo tier «Bravehaeart». Igl ei il toc inizial dil film historic da 1995 cun Mel Gibson. Las medemas, Ladina Capaul e Nina Andreoli, ein era sepresentadas tier «Vivo per Lei». La canzun ch’il renomau Andrea Bocelli ha interpretau cun Céline Dion han ellas duas sunau fetg fin, schuber e cun sentiment.

Tocs plein slontsch, sco era tocs tradiziunals, ein sebrattai. Ins ha astgau guder «Pirates of the Caribbean», e tier igl Amboss Polka han ils dus schumbraders Livio Cavegn ed Aron Collenberg dau il tact cul marti silla mazza. La MGL dispona dil reminent d’in bien fundament cun bass e battaria. Era sch’ins vesa buc els l’entira sera ei quei register d’impurtonza per ina musica instrumentala. Cun sblatschar ha igl auditori pretendiu dus supplements. In’uniun moderna e giuvna ei sepresentada cun vigur, ella garantescha alla Lumnezia che la tradiziun dallas musicas cuntinuescha.

Era ina retscha da sponsurs, denter quels la Repower e la Pleiv catolica Lumnezia miez, han susteniu quei project digl onn 2018. Il marsch «Monterey», lu in arranschament «Rolling in the deep» dil hit dad Adele han plaschiu oreifer, encunter il davos dil program era la 
melodia irlandesa «The Lord of the dance».

Tener il liung flad

Igl auditori ha era giu grond tschaffen dallas 10 novizas ch’ein sepresentadas suenter la pausa. Avon lez han ils tamburs giuvens schau resunar il marsch d’ordonnanza e dus ulteriurs tocs. Ils quater schumbraders han tschaffen da lur instrument. Igl ei buca pli ina gronda gruppa sco antruras, quels che dattan muossan dun e plascher. Ils buns temps cun varga 60 musicantas e musicants ella MGL tuornan puspei, ei descha da tener il liung flad.

Tgi ch’ha fatg musica inagada ha era saviu dar vinavon quei plascher ad auters giuvens. La gruppa dils tamburs giuvens ha exercitau cun Gian Peider Casanova. El sez haveva era entschiet sco tambur ella MGL ed ei restaus activs, en autras formaziuns eis el in tschercau um alla battaria. Al concert d’uonn dalla MGL han ins viu plirs musicants meriteivels. Ils 13 d’october 1990 havevan Robert Casanova, Norbert Capeder, Pieder Alig, Simon Derungs e Clemens Riedi dau il stausch decisiv da fundar la Musica giuvenila Lumnezia. Cun 62 musicantas, musicants e tamburs ha quella entschiet. Ord quella ein passiunai musicants e musicantas sorti ch’han fructificau e rinforzau las musicas ella vallada. Perquei eis ei da sustener tut quei che quella formaziun giuvna fa. Musica ei ina caussa dalla cuminonza e dil cor, musica embellescha e tegn ensemen. En quei senn eis ei da sperar che la populaziun lumneziana astgi aunc visitar numerus concerts dalla MGL.