Romontschs, nua essas?

dad augustin beeli / anr

En paucs gis ei Nadal e la historia dalla naschientscha vegn el center. Oz ston ins buca pli far liungs viadis per separticipar ad ina dumbraziun dil pievel. Sco quella dalla Ligia Romontscha. La Ligia Romontscha ha lantschau avon varga in onn l’acziun da dumbrar il pievel romontsch. Igl ei in’acziun gnanc aschi sempla. Igl onn 2000, culla secunda davosa dumbraziun dil pievel, havevan ins eruiu ina cefra da rodund 60 000 commembers dil quart lungatg svizzer. Sch’igl ei oz mo pli 30 000, sch’igl ei 40 000, ei nunpusseivel d’eruir. Pertgei igl Uffeci federal da statistica fa buca pli dumbraziuns specificas. Pia sto la pintga gruppa linguistica s’organisar sezza. L’acziun da seregistrar ei buc ufficiala ed era buca cumandada da Berna. Aunc uss ein «mo» 8653 persunas seregistradas. L’acziun vul era far attenta la publicitad al problem da statisticas fallidas. En Svizra tudestga, en Svizra franzosa ed en Svizra taliana san ins verificar exact conta glieud che tschontscha quei lungatg. En Romontschia buc. Igl onn 2019 che la LR festivescha siu 100avel anniversari dat ei numerusas caschuns da separticipar all’acziun qualitativa. Tgi che s’enscriva vul esser Romontscha ni Romontsch cun cor ed olma. Tochen igl uost 2019 han ins aunc numerusas caschuns da separticipar alla dumbraziun unica. Tgi ch’ei s’enscrets sa denton buca separticipar ina secunda 
gada.

pagina 3