Salvament dal 
servetsch sanitar

(cc) La publicaziun online «Chantun Grischun – Ils fatgs da salvament dal servetsch sanitar» è vegnida redigida dal departament da giustia, segirezza e sanadad. Ella mussa ils andaments dals fatgs da salvament dal servetsch sanitar e preschenta las organisaziuns involvidas. Ils fatgs da salvament dal servetsch sanitar en il chantun duain garantir che mintga persuna malsauna, disgraziada u en privel survegnia uschè svelt sco pussaivel agid optimal. Persunas malsaunas u disgraziadas duain survegnir a temp util in emprim tractament ed in’assistenza medicinala d’urgenza optimala al lieu da l’eveniment e vegnan tgiradas durant il transport tras persunal medicinal cumpetent. En situaziuns cun privel da mort pon mesiras d’urgenza durant las emprimas minutas avair in’influenza decisiva per il surviver da persunas ch’èn daventadas tuttenina grevamain malsaunas (infarct dal cor, culp) u ch’han gì in grev accident. Agid d’urgenza ed emprim agid pon vegnir prestads da mintga persuna. Tar l’emprim agid tutgi er ch’ins alarmeschia immediat la centrala dal clom d’agid sanitar 144 e che quella clomia immediat en acziun ils meds da salvament e da transport adequats.

Andaments ed organisaziun 
dals fatgs da salvament

La publicaziun «Chantun Grischun – Ils fatgs da salvament dal servetsch sanitar» – ch’è vegnida redigida dal departament da giustia, segirezza e sanadad e ch’è disponibla en furma electronica – ha l’intent da mussar a la publicitad en ina vista generala l’organisaziun actuala dals fatgs da salvament dal servetsch sanitar. Tematisà vegn il tractament d’accidents e da cas medicinals d’urgenza che capitan en il mintgadi. En quest senn preschenta la publicaziun en spezial l’andament dal provediment dal servetsch sanitar sco er las organisaziuns ch’èn integradas en il provediment, inclusiv lur incumbensas. Plinavant vegnan explitgadas las prescripziuns ch’existan per las organisaziuns en quai che reguarda l’alarm, la prontezza a l’acziun, l’equipament sco er la scolaziun, la furmaziun supplementara ed il perfecziunament. Betg tractads en questa publicaziun na vegnan ils andaments dal servetsch sanitar en cas d’eveniments gronds.

La preschentaziun dals fatgs da salvament dal servetsch sanitar en il mintgadi dal chantun Grischun cuntegna la situaziun dal december 2018. Confurm a ses intent vegn la publicaziun electronica adattada periodicamain sch’i resultan novaziuns en l’organisaziun dals fatgs da salvament dal servetsch sanitar.

La publicaziun po vegnir consultada e chargiada giu da la pagina d’internet da l’uffizi da sanadad sco er dal departament da giustia, segirezza e sanadad. Actualmain è la publicaziun disponibla mo per tudestg, la versiun rumantscha e taliana suonda il schaner 2019.

(rtr) Ils presidents communals da Casti-Vargistagn, Donat, Lon e Maton veglian lantschar ina nova emprova da fusiunar. Quai scriva la gasetta «Südostschweiz» sa referind sin il suprastant dal project da fusiun, il president communal da Maton, Andreas Heggendorn. Il suprastant dal project da fusiun, il president communal da Maton, Andreas Heggendorn, ha annunzià da vulair preparar l’onn 2019 la fusiun e da prender en mira la votaziun il 2020. En la Val Schons datti per la terza giada l’emprova da metter en pe ina fusiun. Il 2006 aveva l’emprova da fusiunar l’entira vallada fatg naufragi. Era l’emprova dal 2010 da fusiunar Ziran-Reischen cun las vischnancas da la muntogna n’era betg reussida. Per il 2019 stattan mo las vischnancas da la muntogna, Casti-Vargistagn, Donat, Lon e Maton en discussiun.