Cant e musica plagn targlischour

DA GION NUTEGN STGIER / ANR

En chor cun en colorit plagn sonor, en orchester cun en tung schi sober scu la pi bela steila da Nadal, en dirigent cun ena calmezza professiunala e 1000 candeilas tgi on caschuno ena ambianza anc pi tgoda. Chegl èn stos igls treis concerts da Nadal digl Origen Festival Cultural tgi on attratg passa 2000 persungas. Gio per la 11avla geda ò Giovanni Netzer, igl intendant digl pi grond festival da cultura digl Grischun, transfurmo la halla da producziun dalla Veiadafier retica a Landquart an ena sala da concert cun en’atmosfera plagn legreia, glischainta ed agreabla.

Igl luvratori è davanto ena stalletta tgi sa lascha sa legrar anc pi fitg sen Nadal, la festa dalla gleisch e dalla glorgia. Dus locomotivas nostalgicas ò Netzer tscharnia scu culissa e cun la midada permanenta dalla calour digls trens ò la halla survagnia en’expressiun anc pi singulara, pi atgna e pi cumpletta. Cun Serge Schmucki ò Netzer gia en partenari digl rom schi sa tracta per illuminaziuns e 
per dar ad en concert igl dretg vistgia da festa.

Festiv e romantic

Cun la tscherna da cant e musica digl cumponist franzos Antoine Charpentier on Giovanni Netzer e Clau Scherrer, igl grond «maestro», pi prubabel catto igls pi bels scazis sacrals tgi èn nias mess an notas. Musica baroca, cant baroc tgi èn ias bagn a pêr cun l’ambianza da calour tgoda ainten la gronda stalletta cun en anc pi grond auditori.

I sto esser tgi igl grond cumponist ò gia ena sensibilitad fitg atgna per musica e cant festiv, romantic, plagn calour ed armuneia. La «Messe de Minuit» ò igl Ensemble Vocal Origen interpreto an ena moda tgi vess betg savia esser pi fegna, sonora e cun ena schi gronda exactezza. Remarcabel è er tgi Antoine Charpentier ò mess an tung chell’ovra da belezza, uscheia tgi las vouschs virilas on survagnia daple muntada tgi las vouschs da sopran ed alt.

Singulas parts dall’ovra sacrala ò el scretg per treis vouschs, tenor, bariton e bass, ed interpretadas èn ellas neidas mintgamai dad en «trio» cun vouschs celestialas. En deletg è alloura er sto da vurdar cun tge quietezza e sensibilitad tgi Scherrer ò procuro per en’unitad sen tribuna, graztga a sia direcziun persvadenta.

Cant per ludar igl Signer

Tgi igl Ensemble Vocal Origen è chegl tgi pertotga igls registers dallas vouschs angulivo e cunzont er occupo cun vouschs tgi dattan all’antiera furmaziun ena tscherta siertad ins ò alloura santia bagn tar igl «Te Deum», pi prubabel la pi gronda ovra tgi Antoine Charpentier ò mess an notas e tung.

Tar chell’ovra ò igl chor caschuno cugl cant serious per muments unitars e per ena calmezza tar igl auditori. An chell’ovra, tgi ò cumpiglia ena retgezza da tungs, melodias e stils, tgi tanschan digl simpel agl festiv, da pianos da fegnezza anfignen fortes cun ena dinamica. Tant dall’expressiun scu dall’interpretaziun ò igl chor musso tar igl «Te Deum» danovamaintg las sias capacitads e fermezzas cun en dirigent scu chegl tgi dat betg schi blers.

Musica da belezza

L’introducziun tar las ovras sacralas ò fatg igl orchester «Concerto Stella Matutina». La furmaziun ò er accumpagnea igls 24 cantadours e cantadouras, uscheia tgi lour interpretaziuns èn daventadas en veir deletg cantic e musical. Igl orchester ò alloura do agls treis concerts ena noda anc pi singulara, en’expressiun anc pi sonora e cunzont en maletg cumplet dalla pi bela musica sacrala e classica.

Da tadlar ena belezza tg’ins vess anc dei galdia, cun esser musica dalla classa superioura tgi santign betg gist schi savens tar nous. Ena furmaziun frestga, en orchester plagn veta e cun musicistas e musicists tgi vevan igl dretg sentimaint per far musica schi pura e clera. Totpiglia treis concerts tgi maretan en unic predicat: excellent!