Muntogna da Schons

(anr/bt) Agls vaschinadis da la Muntogna da Schons ân gieu liac igls davos tarvaschegns da quest on. Tuts ân tracto igl preventiv pigls 2019, fixo igl pe da taglia a salvo ligidas. Venavànt e’gl vagnieu infurmo davart igl abunamaint da La Quotidiana a la fusiùn digls vaschinadis sen la Muntogna da Schons.

Igl preventiv sutamess e vagnieu prieu par bien unanimameing digl tarvaschegns. El preveza antradas da 490 000 fràncs a sortidas da 510 000. Da quegl resulta egn surple d’expensas da 20 000 fràncs.

Agl quent da las investiziùns figureschan la cuntribuziùn par la Tgea Glienda d’Andeer cun 17 000 fràncs sco post ple grànd.

Igl pe da taglia resta sainza midada a 120% da la taglia cantunala.

Las ligidas par la perioda d’ufezi digls 2019 antoc’igls 2021 ân purto nignas midadas: Tut igls funcziunaris actuals en vagnieus cunfirmos an lur ufezi. La suprastànza sacumpona venavànt da Marco Dolf (parsura), Rainer Schilling (actuar), Gian Dolf, Erica Dolf-Sutter ad Anton Mani.

Sco revisuras en vagnidas ligidas Bettina Nicca a Franziska Luzi-Michael. Plenavànt tut igls delegos digl vaschinadi c’en vagnieus cunfirmos an lur ufezi.

Sut varia e’gl vagnieu infurmo c’igls vaschinadis da la Muntogna antschevian igl on vagnaint da meter a strada igl project da fusiùn.

Igl preventiv pigls 2019 sutamess agl tarvaschegns quenta cun egn surple d’expensas da 127 000 fràncs.

Las antradas amportan 1,41 miliùns a las expensas 1,58 miliùns. Igl pe da taglia resta a 120% da la taglia cantunala.

Las investiziùns amportan 65 000 fràncs c’en surtut previeus par la Tgea d’atempos Glienda ad Andeer. Leza â da far egna nova tgadafiac ad andrezs pigl persunal.

Igl tarvaschegns â plenavànt gieu da liger egna delegada par la Tgea d’atempos Glienda. Par que ufezi e vagnida ligida Cornelia Michael.

Alura e’gl vagnieu infurmo igl tarvaschegns c’igl vaschinadi da Donat sapartizipeschi ear da la fusiùn digls vaschinadis da la Muntogna da Schons.

Walter Battaglia spera c’igl segi ear ànc oters vaschinadis ca fetschian part da quella fusiùn. «Par dantànt e’gl sir igls vaschinadis da la Muntogna ca sapartizipeschan», gi Bataglia.

Plenavànt â la suprastànza ear infurmo sur da la sia dezisiùn partutgànt igl abunamaint da La Quotidiana.

Igl vaschinadi da Donat e pront da pajear me ple par l’ediziùn da margis da LQ.

«Nus eassan betga pronts da pajear a la Somedia la suma pretandida pigl abunamaint da tut’eanda a par l’antiera vischnànca», dat Battaglia d’antalir.

Plenavànt â’l igl vaschinadi dad adressar danov igls bietgs, quegl vut gir adatar igls nums da veias a numers da tgeas, quegl ca vean fatg dapreschaint sen l’antiera Muntogna.

Tigl preventiv da Lon pigl on proxim e’gl caschùna surtut la sanaziùn da veias da gòld custs, a par l’ustreia segi, savund igl parsura Peter Baumann, ear adigna d’impunder daners. Igl preventiv preveza egn surple d’expensas da 52 380 fràncs. Las antradas amportan 475 345 fràncs a las expensas 527 725 fràncs.

Da las ligidas en vagnieus cunfirmos igls funcziunaris an ufezi. Agl stagl digl suprastànt Paul Haltmaier, ca veva demissiuno, e vagnieu ligieu Andreas Simonett. La suprastànza sacumpona plenavànt dad Elisabeth Beeli, Rebecca Clopath, Peter Bögli ad igl parsura Peter Baumann. Igls ufezis vignan repartgieus a caschùn da l’amprema sasida agl on nov.

Igl pe da taglia e betga sto an discussiùn a resta a 130%.

Sen fundamaint da parscripziùns cantunalas â’l igl vaschinadi da Lon gieu da far egn deposit da material verd. Quel e vagnieu fatg da cuminànza cun tschels vaschinadis da la Muntogna Sura. Quella deponeia â caschuno custs da 32 000 fràncs a vean a caschunar venavànt custs anuals da 1000 fràncs par dischmeter igl material verd.

Igl tarvaschegns e ear vagnieu infurmo ca la suprastànza vegi dezidieu da far ena questiunada, tgi ca viglia taner La Quotidiana, parquegl ca la Somedia veva mess a quent igl abunamaint tanor egna calculaziùn nova a betga purtabla pigl vaschinadi da Lon ca segi, tanor Baumann, pront da surprender igls custs digl abunamaint me par l’ediziùn da margis.

Plenavànt en igls vaschegns vagnieus infurmos sur digl project da la fusiùn digls vaschinadis sen la Muntogna da Schons c’e puspe vagnieu mess ad ir.

La finala â ear igl vaschinadi da Lon d’introdutgear nums da veias a numerar da nov las tgeas. Probavlameing vignan las veias a vagnir numnadas savund igls nums locals tradiziùnals.

A l’antschea da da la radunànza â Christina Casparis digl Parc Natiral Bavregn referieu davart igl project «pros a pastiras» ca preveza d’infurmar indigens a giasts sur da las balteztgas a spezialitads da pros a pastiras sen la Muntogna da Schons. Agl rom da quel vean plazo egn tgar d’infurmaziùn sper l’ustreia Muntsulej, igl qual cuntegna documentaziùns sur da las atgnadads da la cultira a tgartas da viandar. Plenavànt vean igl a dar posts d’observaziùn da flurs ad utscheals an liacs adatos. Par part de’gl easser pussevel d’observar flurs ad utscheals cun agid digl telefonet. Que tgar d’infurmaziùn po ear vagnir plazo utro, ascheia ca p. ex. scolas possian far diever dad el. Que project e vagnieu preu par bien unanimameing.

Igl preventiv pigls 2019 preveza expensas totalas da 609 210 fràncs. Las antradas muntan a 595 570 francs. Da quegl saresulta egn surple d’expensas da 13 640 fràncs. Partutgànt las investiziùns â’gl gieu da vagnir dezidieu tres posts separos. La sanaziùn da la veia da Gurschégn caschùna custs stimos da 347 000 fràncs, digls quals igl resta pigl vaschinadi 155 116 fràncs. La sanaziùn cumpleta da la tgombra d’aua da Gurschégn caschùna custs da 43 500 fràncs, digls quals igl rest pigl vaschinadi 19 600. Plenavant â da vagnir sano igl conduct d’aua a Gurschégn sen egna lungheza da 360 meters. Quegl vean a caschunar custs stimos da 70 000 fràncs a custs restants pigl vaschinadi da 31 500 fràncs. Cun quels tres posts preveza igl preventiv investiziùns netas da 151 100 fràncs. Que preventiv e vagnieu prieu par bein. Igl pe da taglia resta a 100%.

Igl tarvaschegns â ear apruvo da schlunganir igl contract partutgànt igl dretg da biagear cun la sozietad Muntsulej antoc’igl 2024.

Las ligidas en stadas la proxima tractànda. Sco nova cumembra da la Fundaziùn Margrit Bär e vagnida ligida Regina Camenisch-Clopath. Plenavànt e la suprastànza vagnida cunfirmada par egna perioda d’ufezi da dus ons. Ella sacumpona sco savunda: Andreas Heggedorn (parsura), Mathe Camenisch (cassier), Werner Sutter (pastiras), Beat Beeli (actuar) a Beni Dolf (veias, lavurs cumegnas). Ear igls revisurs Simon Beeli a Christian Dolf en vagnieus cunfirmos an lur ufezis.

Plenavànt e’l igl tarvaschegns vagnieu infurmo sur digl project da fusiùn digls vaschinadis da la Muntogna da Schons ca vean mess a strada igl on proxim da cuminànza cun la HTW da Cuira.

Partutgànt igl abunamaint da La Quotidiana â la suprastànza dezidieu da pajear me ple l’ediziùn da margis.

Plenavànt dispona Maton d’egna nova pagina an la ret.

Danov de ear aver liac mintga vendergis sera egna canorta an l’ustreia Muntsulej par tgirar la cumpagneia a discussiunar actualitads. L’amprema canorta â gieu liac an vendergis digls 14 da dezember.