Pei da taglia
resta sin 70 pertschien

(anr/abc) La radunonza communala da Medel ha tractau gievgia sera ils preventivs per 2019. Inagada ei quei il quen current da vischnaunca. Quel preveda entradas da 3 803 900 francs ed expensas da 3 392 200 francs, aschia ch’ei seresulta in gudogn schuber da 411 700 francs. Tier las investiziuns ha la suprastonza proponiu d’installar igl onn proxim ina nova tschaghegna ella resgia communala. La radunonza communala ha approbau il preventiv dil quen da gudogn e sperdita sco era quel dallas investiziuns 2019. Plinavon ha il suveran da Medel priu notizia ed ha approbau il preventiv dall’Ovra electrica Medel. Quel quenta cun in surpli d’entradas da 7752 francs, quei tier entradas dad 1 562 498 ed expensas dad 1 554 746 francs. Sco quei che la vischnaunca da Medel scriva en sia communicaziun dalla radunonza da preventiv risguarda il preventiv dall’ovra electrica communala investiziuns da rodund 140 000 francs.

Ils preventivs 2019 ha la suprastonza fatg risguardond il pei da taglia vertent. Pigl onn proxim ha ella perquei proponiu da schar quel sin 70 pertschien dalla taglia cantunala sempla. Quei ha la radunonza decidiu unanim. Medemamein resta il pei dalla taglia sin schischom sin 1,5 promil sco tochen dacheu. Senza discussiun ha la radunonza approbau ina revisiun digl artechel 22 dalla lescha da baghegiar. Quella pertucca la zona d’hotel. Per saver affittar en quella zona in biro ad in mistergner ni a survetschs ordeifer il turissem han ins stuiu concretisar quei fatg ella lescha.