Staziùn par cargear electromobils ad Andeer

(lw) Igls 21 da dezember e vagnida messa an funcziùn la staziùn publica da cargear electromobils ad Andeer, inizieada digl Parc Natiral Bavregn. Quella staziùn satgata segl parcadi sper igl bogn mineral. Betga lientsch davent e vagnida messa ad ir dacurt la staziùn da cargear velos electrics. Cun quella purschida ân igls manaschùnzs da tut igls vehicals electrics la caschùn da cargear lur velos ad autos electrics. Dantànt ca quels vignan cargieus ân igls possessurs la pussevladad da visitar u igl bogn mineral near spassagear atras la vischnànca.

Staziùn da cargear par dus autos

La staziùn da cargear digl impressari d’energeia Repower e vagnida instalada da la firma Elektro Dettli SA. A la geada pon là vagnir cargieus dus autos electrics da la prestaziùn da 22 kW. La disponibladad digls dus posts e vasevla da tut tains online sen la pagina Plug ’n Roll. Igl curaint par quella staziùn dariva d’energeia regenerabla grischùna fatga cun forza d’aua near energeia solara. Ign po pajear la tgargia cun agid d’egna app, cun tgartas c’en ablas da liger RFID, igl Swiss-Pass near egna tgarta da credit. Igls custs pigl cliaint amportan tschentg raps par minuta a 20 raps par kWh.

Igl tip da la staziùn e igl madem sco quel da Ziràn c’e vagneiu mess an funcziùn l’antscheata da november. Là e’gl vagnieu cargieu 14 geadas vehicals agl curs digl amprem mains. Quegl e 22 uras tains da tgargia ad egn consum d’energeia da 100 kWh.