1852 cullas pigl pignoul da Nadal

DA GION NUTEGN STGIER / ANR

Ensatge pigl îgl è mintg’onn igl pignoul da Nadal davant igl hotel da luxus Badrutt’s Palace a Son Murezza. De per de vign el fotografo plessas gedas, cunzont la seira. Anvido vign igl pignoul da Nadal, tgi fò gronda parada tar l’antrada principala digl Badutt’s Palace Hotel a Son Murezza, adegna igls 6 da december allas 18.00. Igl è chegl igl schinumno «Chrismas Tree Lighting» tg’ins canoscha cunzont er da New York (Manhattan) noua tgi igl anvidar igl pignoul da Nadal cun en’otezza da 25 meters è adegna ena veira attracziun. Illumino vign igl pignoul graztga agls 45 000 peirs (LED) tgi èn fixos sen en cabel da 10 km. 25 000 cristals Swarovski cun ena valeta dad 1,5 milliuns dollars dattan agl pignoul la dretga targlischour. Cun decoraziun e tot peisa igl pignoul 25 tonnas. Durant seis emdas visetan an media per de 500 000 persungas igl plaz noua tgi igl pignoul è plazzo.

En’otezza da 14 meters

Ma ossa puspe tar igl pignoul da Nadal digl Badrutt’s Palace Hotel. A Son Murezza è el siva da blers onns durant igl advent e sur las festas egna dallas grondas attracziuns. Gio la fatscheda digl hotel da tschintg steilas è imposanta e schi igl pignoul vign vetiers para chella anc bler pi maiestousa. Igl pignoul da Nadal ò ena otezza da 14 meters e peisa en pêr tonnas. Anfignen tgi igl pignoul è plazzo, orno, decoro e pront per anvidar vogl gist treis deis. Igl pignoul singular plai betg angal agls passa 400 giasts digl hotel, mabagn er a l’otra «high society» tgi vo tranter Nadal e Bumang se e giu dalla Via Serlas noua tgi dat boutiques exclusivas e cun roba dallas pi ancunaschaintas marcas dalla moda.

15 000 gleischs

Decoro è igl pignoul da Nadal digl Badrutt’s Palace Hotel cun 1852 cullas cotschnas e dad ôr. Chellas on tottas la madema grondezza e dattan uscheia agl pignoul anc daple volumen. 15 000 gleischs segnan per l’illuminaziun e procuran per la dretga atmosfera da Nadal. Pero betg angal igl pignoul è en deletg digl îgl, mabagn er l’illuminaziun dalla Via Serlas. 47 000 lampas pendan per lung dalla veia e laschan daventar chella ena veira aventura. Singular è bagn tgi tar chella illuminaziun singulara mantga er betg la tor, la noda digl Badrutt’s Palace Hotel, er ella an furma da bleras gleischs.